ലോകകപ്പ് കളിക്കാന്‍ ഇന്ത്യയ്‍ക്ക് പുതിയ ജേഴ്‍സി

മുംബൈ: ഇന്ത്യന്‍ ക്രിക്കറ്റ് ടീമിന്‍റെ പുതിയ ജേഴ്‍സി പുറത്തിറക്കി. മഹേന്ദ്ര സിങ് ധോണി, വിരാട് കോഹ്‍ലി, വനിത താരം ഹര്‍മന്‍പ്രീത് കൗര്‍ എന്നിവര്‍ ചേര്‍ന്നാണ് പുതിയ ജേഴ്‍സി പുറത്തിറക്കിയത്. അടുത്ത് തന്നെ നടക്കുന്ന 2019 ഐസിസി പുരുഷ ലോകകപ്പിനായാണ് ജേഴ്‍സി അവതരിപ്പിച്ചത്.



അജിങ്ക്യ രഹാനെ, ജെമീമ റോഡ്രിഗ്‍സ്‍, പൃഥ്വി ഷാ എന്നിവരും ജേഴ്‍സി അണിഞ്ഞു. ഹൈദരബാദില്‍ നടക്കുന്ന ആദ്യ ഏകദിനത്തിലും ഇന്ത്യന്‍ താരങ്ങള്‍ ഈ ജേഴ്‍സിയാണ് അണിയുന്നത്. ഇന്ത്യ ഇതിന് മുന്‍പ് ജയിച്ച മൂന്ന് ക്രിക്കറ്റ് ലോകകപ്പുകളുടെ തീയതികള്‍ ജേഴ്‍സിയില്‍ രേഖപ്പെടുത്തിയിട്ടുണ്ട്. കോളറിന് പിന്നിലായാണ് 1983, 2007, 2011 ഏന്നീ വര്‍ഷങ്ങള്‍ രേഖപ്പെടുത്തിയിട്ടുള്ളത്.

ഡിസൈനെക്കാള്‍ അധികമായി തുണിയുടെ മേന്മായാണ് തന്നെ ആകര്‍ഷിച്ചതെന്ന് ക്രിക്കറ്റര്‍ എംഎസ്‍ ധോണി പറഞ്ഞു. ഇംഗ്ലണ്ട്, വെയില്‍സ്‍ എന്നിവിടങ്ങളിലായാണ് ഇത്തവണ ലോകകപ്പ്. മേയ് 30ന് ആരംഭിക്കുന്ന ലോകകപ്പ് ജൂലൈ 14ന് ആണ് സമാപിക്കുന്നത്.