ഇനി ഒന്നും നോക്കാനില്ല, ഇന്ത്യൻ ടീമിൽ ഇന്ന് വമ്പൻ അഴിച്ചുപണിയുണ്ടാകും, പുറത്താവുക ഈ സൂപ്പർ താരങ്ങളെന്ന് സൂചന
ഏഷ്യാകപ്പ് സൂപ്പർ ഫോറിലെ തങ്ങളുടെ അവസാന പോരാട്ടത്തിൽ ഇന്ത്യ ഇന്ന് അഫ്ഗാനിസ്ഥാനെ നേരിടുന്നു. അഭിമാനജയം നേടി ടൂർണമെന്റിൽ നിന്ന് മടങ്ങാനാകും ഇന്ത്യയുടെ ശ്രമം. മത്സരത്തിലേക്ക് മണിക്കൂറുകൾ മാത്രം ബാക്കി നിൽക്കെ ഇന്ത്യയുടെ സാധ്യത പ്ലേയിംഗ് ഇലവൻ എങ്ങനെയായിരിക്കുമെന്ന് പരിശോധിക്കാം.
കഴിഞ്ഞ മത്സരങ്ങളിൽ കളിച്ച ടീമിൽ നിർണായക മാറ്റങ്ങൾ വരുത്തി ഇന്ത്യ ഇന്ന് കളിക്കാനുള്ള സാധ്യതകൾ ഉയർന്ന് നിൽക്കുന്നു. മോശം ഫോമിലുള്ള ചില വമ്പൻ താരങ്ങൾക്ക് ഇന്ന് പുറത്തിരിക്കേണ്ടി വരുമെന്നാണ് സൂചനകൾ. ഇന്ത്യ-അഫ്ഗാൻ പോരാട്ടത്തിലേക്ക് വെറും മണിക്കൂറുകൾ മാത്രം ബാക്കി നിൽക്കെ ടീം ഇന്ത്യയുടെ സാധ്യത ഇലവൻ എങ്ങനെയായിരിക്കുമെന്ന് പരിശോധിക്കാം...
ടോപ് ഓർഡർ
കഴിഞ്ഞ മത്സരത്തിൽ വെടിക്കെട്ട് ബാറ്റിംഗോടെ ഫോമിലേക്ക് തിരിച്ചെത്തിയ നായകൻ രോഹിത് ശർമ്മയാകും ഇന്നും ഇന്ത്യയുടെ ഓപ്പണർമാരിലൊരാൾ. രോഹിതിന് ഇന്നും തിളങ്ങാൻ കഴിഞ്ഞാൽ ഇന്ത്യ മത്സരത്തിൽ കുതിക്കുമെന്ന് ഉറപ്പ്. അതേ സമയം കെ എൽ രാഹുലായിരിക്കും മറ്റൊരു ഓപ്പണർ. പരിക്ക് മാറിത്തിരിച്ചെത്തിയതിന് ശേഷം ദയനീയ ഫോമിലാണ് താരം. ഏഷ്യാകപ്പിൽ ഇക്കുറി ഇതു വരെ തിളങ്ങാൻ രാഹുലിന് കഴിഞ്ഞില്ല. രാഹുൽ ഫോമിലേക്ക് മടങ്ങിയെത്തുന്നതിനായാണ് ഇപ്പോൾ ആരാധകരുടെ കാത്തിരിപ്പ്. മൂന്നാം നമ്പരിൽ വിരാട് കോഹ്ലി തന്നെയാകും കളിക്കുക. കഴിഞ്ഞ കളിയിൽ പൂജ്യത്തിന് പുറത്തായതിന്റെ ക്ഷീണം മികച്ചൊരു ഇന്നിംഗ്സിലൂടെ കോഹ്ലി തീർക്കുമെന്ന പ്രതീക്ഷയിലാണ് ആരാധകർ.
Also Read : ഈ താരത്തെ ടീമില് ഉള്പ്പെടുത്തണമായിരുന്നെന്ന് രവി ശാസ്ത്രി, ഇന്ത്യ കാട്ടിയത് വമ്പന് അബദ്ധമോ?
മധ്യനിര
സൂര്യകുമാർ യാദവ് തന്നെയാകും ഇന്നും നാലാം നമ്പരിൽ കളിക്കുക. കഴിഞ്ഞ മത്സരത്തിൽ ശ്രീലങ്കക്കെതിരെ തരക്കേടില്ലാത്ത പ്രകടനമായിരുന്നു താരത്തിന്റേത്. വിക്കറ്റ് കീപ്പർ സ്ഥാനത്ത് ഇന്ന് മാറ്റം വരാനുള്ള സാധ്യതയുണ്ട്. കഴിഞ്ഞ കളികളിൽ വിക്കറ്റ് കീപ്പറായി കളിച്ച ഋഷഭ് പന്ത് രണ്ട് മത്സരങ്ങളിലും നിരാശപ്പെടുത്തിയിരുന്നു. ഈ സാഹചര്യത്തിൽ ഇന്ന് ദിനേഷ് കാർത്തിക്കിനെ ഇന്ത്യ പ്ലേയിംഗ് ഇലവനിലേക്ക് തിരിച്ചു വിളിച്ചേക്കും.
സ്റ്റാർ ഓൾ റൗണ്ടർ ഹാർദിക് പാണ്ഡ്യ ഇന്നും ടീമിലുണ്ടാകുമെന്ന കാര്യം ഉറപ്പാണ്. കഴിഞ്ഞ കളികളിൽ തിളങ്ങാൻ കഴിയായിരുന്ന ഹാർദിക്കിൽ നിന്ന് മികച്ചൊരു പ്രകടനമാണ് ഇന്ന് ഇന്ത്യ പ്രതീക്ഷിക്കുന്നത്. അതേ സമയം കഴിഞ്ഞ മത്സരങ്ങളിൽ പ്ലേയിംഗ് ഇലവനിൽ ഉണ്ടായിരുന്ന ദീപക് ഹൂഡക്ക് ഇന്ന് ഇലവനിലെ സ്ഥാനം നഷ്ടമായേക്കും. ഇങ്ങനെ സംഭവിച്ചാൽ പകരം അക്സർ പട്ടേലാകും ടീമിലെത്തുക.
ബോളിംഗ് നിര
കഴിഞ്ഞ കളികളിൽ ഇന്ത്യയുടെ പേസ് നിരയെ നയിച്ച ഭുവനേശ്വർ കുമാറാകും ഇന്നും ഈ റോളിൽ കളിക്കുക. കൂട്ടിന് അർഷ്ദീപ് സിംഗുമുണ്ടാകും. പോയ മത്സരത്തിൽ 3 വിക്കറ്റുകൾ വീഴ്ത്തി തിളങ്ങിയ യുസ്വേന്ദ്ര ചഹൽ ഇന്നും പ്ലേയിംഗ് ഇലവനിലുണ്ടാകുമെന്നാണ് കരുതപ്പെടുന്നത്. കഴിഞ്ഞ കളിയിൽ ടീമിലുണ്ടായിരുന്ന സീനിയർ ഓഫ് സ്പിന്നർ ആർ അശ്വിന് ഇന്ന് പ്ലേയിംഗ് ഇലവനിലെ സ്ഥാനം നഷ്ടമായേക്കും. അശ്വിനെ പുറത്തിരുത്തുകയാണെങ്കിൽ ദീപക് ചഹറാകും പകരമെത്തുക. സ്റ്റാൻഡ് ബൈ താരമായി ഏഷ്യാകപ്പിന് വന്ന ചഹർ, ആവേശ് ഖാൻ പരിക്കേറ്റ് പുറത്തായ സാഹചര്യത്തിലാണ് ഏഷ്യാകപ്പ് സ്ക്വാഡിലെത്തിയത്.
ഇന്ത്യയുടെ സാധ്യത ഇലവൻ ഇങ്ങനെ,
രോഹിത് ശർമ്മ (ക്യാപ്റ്റൻ), കെ എൽ രാഹുൽ, വിരാട് കോഹ്ലി, സൂര്യകുമാർ യാദവ്, ഹാർദിക് പാണ്ഡ്യ, ദിനേഷ് കാർത്തിക്ക്, അക്സർ പട്ടേൽ, ഭുവനേശ്വർ കുമാർ, ദീപക് ചഹർ, യുസ്വേന്ദ്ര ചഹൽ, അർഷ്ദീപ് സിംഗ്.
Also Read : ഈ തോല്വിയൊന്നും ഞങ്ങള്ക്കൊരു വിഷയമേ അല്ലെന്ന് രോഹിത്, മോശം പ്രകടനത്തിന് ന്യായീകരണം