രോഹിത് ശർമ്മയുടെ നേതൃത്വത്തിൽ ഏറ്റവും ശക്തമായ ടീമിനെത്തന്നെയാകും ഇന്ത്യ ഇന്ന് കളിക്കളത്തിൽ ഇറക്കുകയെന്ന കാര്യം ഉറപ്പ്. ആദ്യ ഏകദിനത്തിലേക്ക് മണിക്കൂറുകൾ മാത്രം ബാക്കി നിൽക്കെ ഇന്ത്യയുടെ സാധ്യത പ്ലേയിംഗ് ഇലവൻ എങ്ങനെയായിരിക്കുമെന്ന് നോക്കാം.
ടോപ് ഓർഡർ
നായകൻ രോഹിത് ശർമ്മയും, സീനിയർ ബാറ്റർ ശിഖർ ധവാനും ചേർന്നാകും മത്സരത്തിൽ ഇന്ത്യയുടെ ബാറ്റിംഗ് ഓപ്പൺ ചെയ്യുക. ടി20 ടീമിലില്ലാതിരുന്ന ധവാന്റെ പ്രകടനം ഇന്ത്യയുടെ വിജയപ്രതീക്ഷകളിൽ നിർണായകമാകും. രോഹിത് ശർമ്മക്കും തിളങ്ങാനായാൽ ഇന്ത്യക്ക് കാര്യങ്ങൾ എളുപ്പമാകും. അതേ സമയം പരിക്കിന്റെ പിടിയിലായ സീനിയർ ബാറ്റർ വിരാട് കോഹ്ലി ഇന്ന് കളിക്കുന്ന കാര്യം സംശയമാണ്. അദ്ദേഹമില്ലെങ്കിൽ ശ്രേയസ് അയ്യർ മൂന്നാം നമ്പരിൽ കളിക്കാനുള്ള സാധ്യതകളാണ് പറഞ്ഞു കേൾക്കുന്നത്.
മധ്യനിര
ഇംഗ്ലണ്ടിനെതിരായ അവസാന ടി20യിൽ തകർപ്പൻ സെഞ്ചുറി നേടി ഉജ്ജ്വല ഫോമിലുള്ള സൂര്യകുമാർ യാദവാകും ഇന്ന് ഇന്ത്യയുടെ നാലാം നമ്പർ ബാറ്റർ. കഴിഞ്ഞ മത്സരത്തിലെ ഫോം ഏകദിനപരമ്പരയിലും ആവർത്തിക്കാൻ സൂര്യകുമാർ യാദവിന് കഴിഞ്ഞാൽ ഇംഗ്ലണ്ട് ബോളർമാർ വിയർക്കും. അതേ സമയം യുവ വിക്കറ്റ് കീപ്പർ ബാറ്റർ ഋഷഭ് പന്താകും അഞ്ചാം നമ്പരിലിറങ്ങുക. ഫിനിഷിംഗിന്റെ ദൗത്യം ഹാർദിക് പാണ്ഡ്യക്കും, രവീന്ദ്ര ജഡേജക്കുമാകും.
Also Read : INDvENG: കോഹ്ലി ആദ്യ ഏകദിനത്തിൽ കളിച്ചേക്കില്ല, ഇന്ത്യക്ക് എട്ടിന്റെ പണി
ബോളിംഗ് നിര
സ്റ്റാർ പേസറായ ജസ്പ്രിത് ബുംറയാകും ഇന്ന് ഇന്ത്യയുടെ പേസ് നിരയെ നയിക്കുക. തന്റെ മികച്ച ഫോം പുറത്തെടുക്കാൻ ബുംറക്കായാൽ ഇംഗ്ലണ്ട് ഇന്നും വിയർക്കും. ബുംറക്ക് കൂട്ടായി മൊഹമ്മദ് ഷമിയും ഇന്ന് ടീമിലുണ്ടാകുമെന്ന കാര്യമുറപ്പ്. ഇവർക്ക് പുറമേ മൂന്നാം പേസറായി പ്രസിദ് കൃഷ്ണ, ഷർദുൽ താക്കൂർ എന്നിവരിലൊരാളും കളിക്കും. യുസ്വേന്ദ്ര ചഹലാകും ടീമിലെ ഏക സ്പെഷ്യലിസ്റ്റ് സ്പിന്നർ.
ഇന്ത്യൻ സാധ്യത ഇലവൻ & മത്സരത്തിന്റെ തത്സമയ സംപ്രേക്ഷണം
രോഹിത് ശർമ്മ (ക്യാപ്റ്റൻ, ശിഖാർ ധവാൻ, വിരാട് കോഹ്ലി/ശ്രേയസ് അയ്യർ, സൂര്യകുമാർ യാദവ്, ഋഷഭ് പന്ത്, ഹാർദിക് പാണ്ഡ്യ, രവീന്ദ്ര ജഡേജ, ഷർദുൽ താക്കൂർ/പ്രസിദ് കൃഷ്ണ, മൊഹമ്മദ് ഷമി, ജസ്പ്രിത് ബുംറ, യുസ്വേന്ദ്ര ചഹൽ.
ലണ്ടനിലെ കെന്നിംഗ്ടൺ ഓവലിലാണ് ഇന്ത്യയും ഇംഗ്ലണ്ടും തമ്മിലുള്ള ഏകദിന പരമ്പരയിലെ ആദ്യ മത്സരം നടക്കുന്നത്‌. ഇന്ത്യൻ സമയം വൈകിട്ട് 5.30 ന് മത്സരം ആരംഭിക്കും. ഇന്ത്യയിൽ സോണി സ്പോർട്സ് നെറ്റ്‌വർക്കാണ് മത്സരം തത്സമയം സംപ്രേക്ഷണം ചെയ്യുന്നത്. സോണി സിക്സ്, സോണി ടെൻ 3, സോണി ടെൻ 4 എന്നിവയിലൂടെയും സോണി ലിവ് ആപ്പിലൂടെയും മത്സരം തത്സമയം കാണാം. ദൂരദർശനിലും കളിയുടെ തത്സമയ സംപ്രേക്ഷണമുണ്ടാകും.
Also Read : കോഹ്ലിയെക്കുറിച്ചുള്ള ചോദ്യത്തിന് ചൂടായി രോഹിത് ശര്‍മ, മുന്‍ കളിക്കാര്‍ക്ക് ക്യാപ്റ്റന്റെ വിമര്‍ശനം