പരമ്പരയിലെ ആദ്യ മത്സരത്തിൽ തങ്ങളുടെ ഏറ്റവും മികച്ച ടീമിനെത്തന്നെയാകും ഇന്ത്യ കളത്തിലിറക്കുക. മത്സരത്തിലേക്ക് മണിക്കൂറുകൾ മാത്രം ബാക്കി നിൽക്കെ ഇന്ത്യയുടെ സാധ്യത ഇലവൻ എങ്ങനെയായിരിക്കുമെന്ന് പരിശോധിക്കാം.
ടോപ് ഓർഡർ
നായകൻ രോഹിത് ശർമ്മയും ഉപനായകൻ കെ എൽ രാഹുലുമാകും മത്സരത്തിൽ ഇന്ത്യയുടെ ബാറ്റിംഗ് ഓപ്പൺ ചെയ്യുക. ഏഷ്യാകപ്പിൽ 4 മത്സരങ്ങളിൽ നിന്ന് 133 റൺസ് നേടിയ രോഹിത് ശർമ്മ ഒരു അർധ സെഞ്ചുറിയും സ്കോർ ചെയ്തിരുന്നു. കെ എൽ രാഹുലിനാകട്ടെ പരിക്കിന് ശേഷം മടങ്ങിയെത്തിക്കഴിഞ്ഞ് കാര്യമായി തിളങ്ങാനായിട്ടില്ല. ഏഷ്യാകപ്പിൽ 5 കളികളിൽ നിന്ന് 132 റൺസായിരുന്നു അദ്ദേഹത്തിന്റെ സമ്പാദ്യം. ഓസ്ട്രേലിയക്കെതിരായ പരമ്പരയിൽ രാഹുൽ ഫോമിലേക്ക് മടങ്ങിയെത്തുമെന്നാണ് ആരാധകരുടെ വിശ്വാസം.
നിലവിൽ ഉജ്ജ്വല ഫോമിലുള്ള വിരാട് കോഹ്ലിയാകും മൂന്നാം നമ്പരിൽ കളിക്കുക. ഏഷ്യാ കപ്പിലെ ഫോം ഓസ്ട്രേലിയക്കെതിരെയും തുടരാൻ കോഹ്ലിക്കായാൽ ഇന്ത്യക്ക് കാര്യങ്ങൾ എളുപ്പമാകും.
Also Read : INDvAUS: മൊഹാലി കോഹ്ലിയുടേയും ഇന്ത്യയുടേയും ഭാഗ്യ മൈതാനം, അമ്പരപ്പിക്കുന്ന കണക്കുകള് ഇതാ
മധ്യനിര
സമീപകാലത്ത് ഇന്ത്യയുടെ ഏറ്റവും മികച്ച ടി20 ബാറ്ററായ സൂര്യകുമാർ യാദവാകും നാലാം നമ്പരിൽ കളിക്കുക. തന്റേതായ ശൈലിയിൽ ഒരു 20 ബോൾ കളിക്കാൻ സൂര്യക്കായാൽ കളി ഇന്ത്യയുടെ വരുതിയിലാവും. ഋഷഭ് പന്തും മധ്യനിരയിലുണ്ടാകാനുള്ള സാധ്യത ഉയർന്ന് നിൽക്കുന്നു. പരിചയസമ്പത്തിന് മുൻ തൂക്കം കൊടുക്കാൻ ഇന്ത്യ തീരുമാനിച്ചാൽ മാത്രം പന്തിനെ മറികടന്ന് ദിനേഷ് കാർത്തിക്ക് ടീമിന്റെ വിക്കറ്റ് കീപ്പറാകും.
സ്പിൻ ബോളിംഗ് ഓൾ റൗണ്ടറായ അക്സർ പട്ടേലും ആദ്യ ടി20യിൽ പ്ലേയിംഗ് ഇലവനിൽ ഉണ്ടാകാനുള്ള സാധ്യത ഉയർന്ന് നിൽക്കുന്നു. ജഡേജ പരിക്കേറ്റ് ലോകകപ്പിൽ നിന്ന് പുറത്തായിക്കഴിഞ്ഞതിനാൽ അദ്ദേഹത്തിന്റെ റോളിൽ അക്സറാകും ഈ പരമ്പരയിൽ കളിക്കുക.
ബോളിംഗ് നിര
ഏഷ്യാകപ്പിൽ പ്രതീക്ഷിച്ച നിലവാരത്തിലേക്ക് ഉയരാൻ ഇന്ത്യയുടെ ബോളിംഗ് നിരക്ക് കഴിഞ്ഞിരുന്നില്ല. ടീം ഫൈനലിലെത്താതെ പുറത്തായതിന് പിന്നിലെ കാരണങ്ങളിലൊന്നും ഇതായിരുന്നു. എന്നാൽ പരിക്ക് മൂലം ഏഷ്യാകപ്പ് സ്ക്വാഡിൽ ഇല്ലാതിരുന്ന ജസ്പ്രിത് ബുംറയും, ഹർഷാൽ പട്ടേലും ടീമിലേക്ക് മടങ്ങിയെത്തുന്നതിനാൽ ഓസ്ട്രേലിയക്കെതിരായ പരമ്പരയിൽ ഇന്ത്യയുടെ ബോളിംഗ് ശക്തമാകും.
ജസ്പ്രിത് ബുംറ തന്നെയാകും ആദ്യ ടി20യിൽ ഇന്ത്യയുടെ ബോളിംഗ് നിരയെ നയിക്കുക. പേസ് നിരയിൽ അദ്ദേഹത്തിന് കൂട്ടായി ഭുവനേശ്വർ കുമാറും, ഹർഷൽ പട്ടേലുമുണ്ടാകാനാണ് സാധ്യത. യുസ്വേന്ദ്ര ചഹൽ ഏക സ്പെഷ്യലിസ്റ്റ് സ്പിന്നറുടെ സ്ഥാനത്ത് കളിക്കുമെന്നാണ് കരുതപ്പെടുന്നത്. ഏറെക്കാലത്തിന് ശേഷം ബുംറയുടേയും, ഹർഷലിന്റേയും പ്രകടനം വീക്ഷിക്കാനുള്ള കാത്തിരിപ്പിലാണ് ഇപ്പോൾ ഇന്ത്യൻ ആരാധകർ.
Also Read : ഇന്ത്യന് ക്രിക്കറ്റ് ടീമിന്റെ ടി20 ലോകകപ്പ് ജഴ്സി പുറത്തിറക്കി,കിടിലനെന്ന് ആരാധകർ
ആദ്യ ടി20 മത്സരത്തിനുള്ള ഇന്ത്യൻ സാധ്യത ഇലവൻ
രോഹിത് ശർമ്മ (ക്യാപ്റ്റൻ), കെ എൽ രാഹുൽ, വിരാട് കോഹ്ലി, സൂര്യകുമാർ യാദവ്, ഋഷഭ് പന്ത്, ഹാർദിക് പാണ്ഡ്യ, അക്സർ പട്ടേൽ, ഭുവനേശ്വർ കുമാർ, ഹർഷൽ പട്ടേൽ, ജസ്പ്രിത് ബുംറ, യുസ്വേന്ദ്ര ചഹൽ.
Read Latest Sports News and Malayalam News