BCCI: ആ ഹെല്‍മെറ്റ് അശ്വിന് പണിയായി!! ബിസിസിഐ പിഴശിക്ഷ വിധിച്ചേക്കും

ബെംഗളൂരു: ആഭ്യന്തര മത്സരങ്ങളില്‍ ബിസിസിഐയുടെ ലോഗോ പതിച്ച ഹെല്‍മെറ്റ് ഉപയോഗിച്ച ഇന്ത്യന്‍ സ്പിന്നര്‍ ആര്‍ അശ്വിന്‍ വിവാദത്തില്‍. കഴിഞ്ഞ ദിവസം നടന്ന വിജയ് ഹസാരെ ട്രോഫിയുടെ ഫൈനല്‍ മത്സരത്തിലാണ് ബിസിസിഐയുടെ ലോഗോയുള്ള ഹെല്‍മെറ്റ് ധരിച്ച് അശ്വിന്‍ കളിച്ചത്. കര്‍ണാടകയ്ക്ക് എതിരെയായിരുന്നു മത്സരം. എന്നാല്‍ സംഭവത്തില്‍ താരത്തിനെതിരെ നടപടിക്ക് ഒരുങ്ങുകയാണ് ബിസിസിഐ.

Also Read: കിലിയന്‍ എംബാപ്പെ റയല്‍ മാഡ്രിഡിലേക്ക്? ബെയ്‍ലിനേയും റോഡ്രിഗസിനേയും റയല്‍ ഒഴിവാക്കുന്നു!!

വിജയ് ഹസാരെ ട്രോഫി പോലുള്ള ആഭ്യന്തര ക്രിക്കറ്റ് മത്സരങ്ങളില്‍ ബിസിസിഐയുടെ ലോഗോ പതിച്ച ഹെല്‍മെറ്റ് ഉപയോഗിക്കരുത് എന്നാണ് ചട്ടം. അതേസമയം ദേശീയ ടീമിനായി കളിക്കുമ്പോള്‍ ഉപയോഗിക്കുന്ന ഹെല്‍മെറ്റാണ് ധരിക്കുന്നതെങ്കില്‍ ബിസിസിഐയുടെ ലോഗോ ഉള്ള ഭാഗം മറച്ചിരിക്കണം. എന്നാല്‍ ഈ ലോഗോ മറയ്ക്കാതെയാണ് അശ്വിന്‍ ഹെല്‍മെറ്റ് ഉപയോഗിച്ചത്. ഇതിന് പിന്നാലെയാണ് ബിസിസിഐ നടപടിക്ക് ഒരുങ്ങുന്നത്.

Also Read: ആറാം സീസണ്‍ ഐഎസ്എല്ലിന് നിര്‍ണായകം!! ഇനി എല്ലാം ആരാധകര്‍ തീരുമാനിക്കും

വിഷയത്തില്‍ നടപടി എന്ന നിലയില്‍ ബിസിസിഐ താരത്തിന് പിഴശിക്ഷ വിധിക്കാനാണ് സാധ്യത. മത്സരത്തില്‍ മറ്റൊരു ഇന്ത്യന്‍ താരമായ മായങ്ക് അഗര്‍വാളും ബിസിസിഐയുടെ ലോഗോ ഉള്ള ഹെല്‍മെറ്റ് തന്നെയായിരുന്നു ധരിച്ചിരുന്നത്. എന്നാല്‍ ലോഗോയുള്ള ഭാഗം ടേപ്പ് ഉപയോഗിച്ച് മറച്ചതിന് ശേഷമാണ് മായങ്ക് ഹെല്‍മെറ്റ് ധരിച്ചത്. ഇക്കാര്യത്തില്‍ വേണ്ടത്ര ശ്രദ്ധ പുലര്‍ത്താതിരുന്നതാണ് അശ്വിന് വിനയായിരിക്കുന്നത്.