വാർണറിൻെറ പരിക്കിൽ വിവാദ പരാമർശവുമായി രാഹുൽ; ഇത് വല്ലാത്ത വിവരക്കേടെന്ന് ആരാധകർ!!

ഇന്ത്യക്കെതിരായ രണ്ടാം ഏകദിനത്തിനിടെ ഫീൽഡ് ചെയ്യുന്നതിനിടയിലാണ് ഓസ്ട്രേലിയൻ സൂപ്പർതാരം ഡേവിഡ് വാർണറിന് പരിക്കേറ്റത്. നാഭിയിൽ ഗുരുതരമായി പരിക്കേറ്റ താരത്തെ ഉടൻ തന്നെ സ്കാനിങിനായി ആശുപത്രിയിലേക്ക് മാറ്റിയിരുന്നു. പരിശോധനകൾക്ക് ശേഷം വാർണറിന് വിശ്രമം വേണമെന്ന് ഡോക്ടർമാർ വ്യക്തമാക്കി. ഇന്ത്യക്കെതിരായ മൂന്നാം ഏകദിനത്തിലും ടി20 പരമ്പരയിലും വാർണർ കളിക്കില്ല.

വാർണറിൻെറ പരിക്കുമായി ബന്ധപ്പെട്ട് ഇന്ത്യൻ ഉപനായകൻ കെഎൽ രാഹുൽ നടത്തിയ പരാമർശം വിവാദത്തിലായിരിക്കുകയാണ്. വാർണറിൻെറ പരിക്ക് പെട്ടെന്ന് മാറിയില്ലെങ്കിൽ ഇന്ത്യൻ ടീമിന് ഗുണം ചെയ്യുമെന്നാണ് രാഹുൽ വാർത്താസമ്മേളനത്തിൽ പറഞ്ഞത്. പരിക്ക് പെട്ടെന്ന് മാറരുതെന്ന് ആഗ്രഹിക്കുന്നതായും രാഹുൽ പറഞ്ഞു.

"അദ്ദേഹത്തിൻെറ പരിക്ക് എത്രത്തോളം ഗുരുതരമാണെന്ന് അറിയില്ല. കുറേക്കാലത്തിന് പരിക്ക് മാറാതിരിക്കുകയാണെങ്കിൽ സന്തോഷമേയുള്ളൂ. ആരെയും പറ്റി അങ്ങനെ പറയുന്നത് ശരിയല്ല. വാർണർ അവരുടെ പ്രധാന ബാറ്റ്സ്മാനാണ്. അദ്ദേഹം കളിക്കാതിരുന്നാൽ ഇന്ത്യക്ക് ഗുണമേയുള്ളൂ," രാഹുൽ പറഞ്ഞു. താരത്തിൻെറ പരാമർശത്തിനെതിരെ രൂക്ഷവിമർശനം ഉയർത്തി ആരാധകർ രംഗത്തെത്തിയിരിക്കുകയാണ്.

Also Read: അവൾ യേസ് പറഞ്ഞു, അവ‍ർ ചുംബിച്ചു; രണ്ടാം ഏകദിനത്തിനിടെ ഇന്ത്യ - ഓസീസ് പ്രണയഗാഥ - വീഡിയോ!!

എതിർ ടീമിലെ കളിക്കാരൻ പരിക്കേറ്റ് കളിക്കാതിരിക്കട്ടെയെന്ന് കരുതുന്നത് സ്പോർട്സ്മാൻ സ്പിരിറ്റ് ഇല്ലാത്ത ചിന്താഗതിയാണെന്ന് അവർ ചൂണ്ടിക്കാട്ടുന്നു. ഇന്ത്യക്കെതിരെ ഏകദിന പരമ്പരയിലെ ആദ്യ രണ്ട് മത്സരങ്ങളിലും വാർണർ മികച്ച ഫോമിലായിരുന്നു. 69 റൺസും 83 റൺസുമാണ് അദ്ദേഹം നേടിയത്.