സിംബാവെക്കെതിരെ അരങ്ങേറ്റം, രാജസ്ഥാൻെറ വെടിക്കെട്ട് ബാറ്റ്സ്മാൻ; ഡബിൾ സെഞ്ച്വറിയുമായി റെക്കോർഡ്; വീണ്ടും സഞ്ജു വരുന്നൂ... കരുതിയിരുന്നോളൂ!!

ന്യൂഡൽഹി: നാല് വർഷങ്ങൾക്ക് ശേഷം മലയാളി ക്രിക്കറ്റർ സഞ്ജു സാംസൺ ഇന്ത്യൻ ക്രിക്കറ്റ് ടീമിലേക്ക് മടങ്ങിയെത്തുകയാണ്. സിംബാവെക്കെതിരെ 2015ലായിരുന്നു സഞ്ജുവിൻെറ ടി20 അരങ്ങേറ്റം. ദേശീയ ടീമിൽ കാര്യമായി ഒന്നും ചെയ്യാൻ സഞ്ജുവിന് സാധിച്ചില്ല. മഹേന്ദ്ര സിങ് ധോണിയെന്ന മഹാമേരു ഇന്ത്യൻ ക്രിക്കറ്റ് ടീമിൻെറ നെടുന്തൂണായി നിന്നിടത്തോളം കാലം പിന്നീട് സഞ്ജുവിന് നീലക്കുപ്പായത്തിൽ ഇറങ്ങാൻ സാധിച്ചിരുന്നില്ല.

ടീമിലേക്ക് ഇപ്പോഴുള്ള വരവ് സഞ്ജു അധ്വാനിച്ച് നേടിയതാണ്. രാജസ്ഥാൻ റോയൽസിന് വേണ്ടി കഴിഞ്ഞ ഐപിഎൽ സീസണിൽ സഞ്ജു തിളങ്ങിയിട്ടും റിഷഭ് പന്തിൽ തന്നെയായിരുന്നു ധോണിയുടെ പിൻഗാമിയെ ഇന്ത്യൻ സെലക്ടർമാർ കണ്ടത്. എന്നാൽ ടി20യിൽ കിട്ടിയ രണ്ട് അവസരങ്ങളിൽ പന്ത് പ്രതീക്ഷിച്ച പ്രകടനം കാഴ്ച വെക്കാതിരുന്നത് സഞ്ജുവിന് തുണയായി.

Also Read: ലോകത്ത് നേരിട്ട ഏറ്റവും മികച്ച ബാറ്റ്സ്മാൻ ഈ ഇന്ത്യൻ താരമെന്ന് വെട്ടോറി; ഭയം തോന്നിയത് ഓസീസ് താരത്തോട്!!

പ്രാദേശിക ക്രിക്കറ്റിൽ ഈയടുത്ത് താരം കാഴ്ച വെച്ച പ്രകടനം അത്ഭുതകരമായിരുന്നു. അവസാന പത്ത് ഇന്നിങ്സുകളിലെ സ്കോർ നോക്കിയാൽ അറിയാം സഞ്ജു എങ്ങനെയാണ് ഇന്ത്യൻ ടീമിലേക്ക് രണ്ടാം വരവ് നടത്തുന്നതെന്ന്.
ദക്ഷിണാഫ്രിക്ക എ ടീമിനെതിരെ ഇന്ത്യ എ ടീമിനായി നേടിയ 48 പന്തിൽ നിന്ന് 91 റൺസ് വരവറിയിക്കുന്നതായിരുന്നു.

പിന്നീട് കർണാടകക്കെതിരെ കേരളത്തിനായി 67 റൺസ് നേടി. ഒടുവിൽ ഗോവക്കെതിരെ 212 റൺസുമായി വെടിക്കെട്ട് ഡബിൾ സെഞ്ച്വറി. ലിസ്റ്റ് എ ക്രിക്കറ്റിൽ ഡബിൾ സെഞ്ച്വറി നേടിയ ആറാമത് ഇന്ത്യൻ ബാറ്റ്സ്മാൻ ആയും സഞ്ജു മാറി. അവഗണിക്കാനാവാത്ത ഈ ബാറ്റിങ് പ്രകടനം തന്നെയാണ് മലയാളി ക്രിക്കറ്ററെ രണ്ടാമതും ടീമിലെത്തിച്ചത്. ഇനി സഞ്ജു തെളിയിക്കേണ്ടത് ടീമിലാണ്. അതിന് പ്ലേയിങ് ഇലവനിൽ അവസരം കിട്ടുമോയെന്നതാണ് ഇനി കണ്ടറിയേണ്ടത്.