മൂന്നാം ഏകദിനത്തിൽ ഇന്ത്യയെ നിലംപരിശാക്കി ഇംഗ്ലണ്ട്

ലീഡ്സ്: ഇന്ത്യക്കെതിരായ മൂന്നാം ഏകദിനത്തില്‍ ഇംഗ്ലണ്ടിന് തകര്‍പ്പൻ വിജയം. എട്ടു വിക്കറ്റിനാണ് ഇന്ത്യയെ ഇംഗ്ലണ്ട് നിലംപരിശാക്കി പരമ്പര നേടിയത്(2-1). ഇന്ത്യ ഉയര്‍ത്തിയ 257 റണ്‍സ് എന്ന വിജയലക്ഷ്യം ഇംഗ്ലണ്ടിന് 44.3 ഓവറില്‍ രണ്ടു വിക്കറ്റ് നഷ്ടത്തില്‍ മറികടക്കാനായി. ഇംഗ്ലണ്ടിന്‍റെ ജോ റൂട്ടിന്‍റെ സെഞ്ചുറി പ്രകടനവും നായകന്‍ ഇയാന്‍ മോര്‍ഗന്‍റെ തകര്‍പ്പന്‍ ബാറ്റിംഗും ടീമിന് വിജയത്തിലേക്കുള്ള യാത്ര അനായാസമാക്കി.

120 പന്തില്‍ ജോ റൂട്ട് 100 റണ്‍സ് നേടിയപ്പോൾ ഇയാന്‍ മോര്‍ഗന്‍ 108 പന്തില്‍ 88 റണ്‍സ് നേടി ക്രീസിൽ നിലകൊണ്ടു. ജെയിംസ് വിന്‍സിന്‍റെയും ജോണി ബെയര്‍സ്റ്റോയുടെയും വിക്കറ്റുകള്‍ മാത്രമാണ് ഇംഗ്ലണ്ടിന് നഷ്ടമായത്. ജെയിംസ് വിന്‍സ് 27 ബോളുകളിൽ 27 റൺസ് നേടിയപ്പോൾ ജോണി ബെയര്‍സ്റ്റോ 13 പന്തില്‍ 30 റൺസും നേടിയാണ് പുറത്തായത്. ആദ്യം ബാറ്റിംഗിനിറങ്ങിയ ഇന്ത്യ അമ്പതോവറില്‍ എട്ടു വിക്കറ്റ് നഷ്ടത്തില്‍ 256 റണ്‍സാണ് എടുത്തത്.

ആദില്‍ റഷീദ് ഇന്ത്യന്‍ ബാറ്റിംഗ് നിരയെ തകര്‍ത്തെറിഞ്ഞ് വിരാട് കോഹ്‌ലി(71) ഉള്‍പ്പെടെ മൂന്നു വിക്കറ്റുകളും വീഴ്ത്തി. ശിഖര്‍ ധവാന്‍-വിരാട് കോഹ്‌ലി കൂട്ടുകെട്ട് ക്രീസിൽ പിടിച്ചു നിന്നാണ് ഇന്ത്യയ്ക്ക് അല്‍പ്പമെങ്കിലും ഭേദപ്പെട്ട സ്കോര്‍ നേടാനായത്. ദിനേശ് കാര്‍ത്തിക് 21 റണ്‍സെടുത്തപ്പോൾ എം.എസ് ധോണി 42 റണ്‍സും നേടി.