ഇംഗ്ലണ്ടിനെതിരായ തോൽവി; ശാസ്ത്രിയെ വിമർശിച്ച് ഗാംഗുലി

ന്യൂഡൽഹി: ഇംഗ്ലണ്ടിനെതിരായ നാലാം ടെസ്റ്റിൽ ഇന്ത്യ പരാജയപ്പെട്ടതിൻെറ പ്രധാന ഉത്തരവാദിത്വം പരിശീലകൻ രവി ശാസ്ത്രിക്കും ബാറ്റിങ് പരിശീലകൻ സഞ്ജയ് ബംഗാറിനും ആണെന്ന് മുൻ ഇന്ത്യൻ നായകൻ സൗരവ് ഗാംഗുലി. ഒരു സ്വകാര്യ ചാനലിന് നൽകിയ അഭിമുഖത്തിലാണ് ഗാംഗുലിയുടെ പ്രതികരണം.

പരാജയത്തിൻെറ കാരണം പരിശീലകർ വിലയിരുത്തണം. ഇക്കാര്യത്തിൽ വിശദീകരണം നൽകേണ്ടത് അവരാണ്. ഇപ്പോഴെങ്കിലും മറുപടി പറഞ്ഞില്ലെങ്കിൽ തോൽവി പരമ്പരകൾ ആവർത്തിക്കുമെന്നും ഗാംഗുലി പറഞ്ഞു. നാലാം ടെസ്റ്റ് പരാജയപ്പെട്ട ഇന്ത്യ ടെസ്റ്റ് പരമ്പരയും ഇംഗ്ലണ്ടിന് അടിയറ വെച്ചു. ഇനി ഒരേയൊരു ടെസ്റ്റ് മാത്രമാണ് ബാക്കിയുള്ളത്.

ഇന്ത്യൻ നിരയിൽ വിരാട് കോഹ‍്‍ലി മാത്രമാണ് ആത്മവിശ്വാസത്തോടെ കളിക്കുന്ന ഏക ബാറ്റ്സ്മാൻ. രഹാനെയും പൂജാരയും വിരാടിനൊപ്പം നന്നായി കളിച്ചിരുന്ന താരങ്ങളാണ്. അവർക്കൊക്കെ എന്ത് സംഭവിക്കുന്നുവെന്ന കാര്യത്തിൽ മറുപടി പറയേണ്ടത് ബാറ്റിങ് പരിശീലകനാണെന്നും ഗാംഗുലി കൂട്ടിച്ചേർത്തു.