വനിതാ ട്വൻറി20 ലോകകപ്പിൽ ഇന്ത്യ ഇന്ന് പാകിസ്ഥാനെതിരെ

ഗയാന: ട്വൻറി20 വനിതാ ലോകകപ്പിൽ ഇന്ത്യ ഇന്ന് പാകിസ്ഥാനെതിരെ ഇറങ്ങും. ആദ്യമത്സരത്തിൽ ന്യൂസിലൻറിനെ തോൽപ്പിച്ചതിൻെറ ആത്മവിശ്വാസത്തിലാണ് ഇന്ത്യ. ഹ‍ർമൻ പ്രീത് കൗറിൻെറ സെഞ്ച്വറി മികവിലാണ് ഇന്ത്യ 34 റൺസിന് കരുത്തരായ കിവീസിനെ പരാജയപ്പെടുത്തിയത്.

ഇന്ത്യൻ ക്യാപ്റ്റൻ ഹ‍ർമൻ പ്രീത് 51 പന്തിൽ നിന്ന് 103 റൺസ് നേടിയാണ് ടീമിനെ മുന്നിൽ നിന്ന് നയിച്ചത്. 2016ലെ വനിതാ ടി20 ലോകകപ്പിൽ ഇന്ത്യ പാകിസ്ഥാനോട് തോറ്റിരുന്നു. എന്നാൽ പിന്നീട് കളിച്ച മൂന്ന് മത്സരങ്ങളിൽ പാകിസ്ഥാനോട് ഇന്ത്യയാണ് വിജയം നേടിയത്.

ലോകകപ്പിലെ ആദ്യമത്സരത്തിൽ തോൽവിയോടെയാണ് പാകിസ്ഥാൻ തുടങ്ങിയത്. 52 റൺസിന് അവർ ഓസ്ട്രേലിയയോടാണ് പരാജയപ്പെട്ടത്.