ഇനി മുന്നിലുള്ളത് അത് മാത്രം, നേടിയെടുത്തേ പറ്റൂ; പുതിയ ലക്ഷ്യം വെളിപ്പെടുത്തി പാണ്ഡ്യ

ന്യൂഡൽഹി: ദക്ഷിണാഫ്രിക്കക്ക് എതിരായ പരമ്പരക്ക് ഒരുങ്ങുകയാണ് ടീം ഇന്ത്യ. പരിമിത ഓവർ ക്രിക്കറ്റിൽ ഇന്ത്യയുടെ നിർണായക താരമായ ഹാർദിക് പാണ്ഡ്യ ലോകകപ്പിന് ശേഷം വിശ്രമത്തിലായിരുന്നു. വെസ്റ്റ് ഇൻഡീസ് ടൂറിൽ പാണ്ഡ്യ കളിച്ചിരുന്നില്ല. ഐപിഎല്ലിലെ മികച്ച പ്രകടനത്തിന് ശേഷം ലോകകപ്പിൽ പാണ്ഡ്യയിൽ നിന്ന് ഇന്ത്യ ഏറെ പ്രതീക്ഷിച്ചിരുന്നു.

ലോകകപ്പ് പരാജയത്തിൽ നിന്നും ഇന്ത്യൻ ടീം പൂർണമായും മുക്തമായി കഴിഞ്ഞുവെന്ന് ഐഎഎൻസിന് നൽകിയ പ്രത്യേക അഭിമുഖത്തിൽ പാണ്ഡ്യ പറഞ്ഞു. ലോകകപ്പിന് ശേഷം ദക്ഷിണാഫ്രിക്കൻ പര്യടനത്തിലാണ് താരം ആദ്യമായി കളിക്കാൻ പോവുന്നത്.

"അത് വളരെ നിരാശാജനകമായി സമയമായിരുന്നു, ടീം എന്ന നിലയിൽ എല്ലാവരും വിഷമത്തിലായിരുന്നു. പക്ഷേ ജീവിതത്തിൽ നമുക്ക് മുന്നോട്ട് പോവേണ്ടതുണ്ട്. ജേതാക്കളെ പോലെയാണ് നമ്മൾ കളിച്ചത്. എന്നാൽ 30 മിനിറ്റ് മോശം പ്രകടനം എല്ലാം തകർത്ത് കളഞ്ഞു," പാണ്ഡ്യ പറഞ്ഞു.

Read More: ലോകത്തെ ഏറ്റവും മികച്ച ബാറ്റ്സ്മാൻ ആരാണ് ?റബാദയുടെ ഉത്തരം ഇങ്ങനെ!

"ഇനി മുന്നിലുള്ളത് ട്വൻറി20 ലോകകപ്പാണ്. അത് നേടിയെടുക്കുകയെന്നതാണ് സുപ്രധാന ലക്ഷ്യം. സ്വന്തമാക്കിയേ പറ്റൂ," പാണ്ഡ്യ പറഞ്ഞു. മത്സരങ്ങളിൽ പ്രത്യേക ലക്ഷ്യത്തോടെ കളിക്കാറില്ല. നന്നായി തയ്യാറെടുപ്പ് നടത്താറുണ്ട്. "എനിക്ക് എവിടെയാണ് കൂടുതൽ ഇംപ്രൂവ് ചെയ്യേണ്ടത് അത് ഓരോ മത്സരത്തിന് മുമ്പും ശരിയാക്കാൻ ശ്രമിക്കും," പാണ്ഡ്യ പറഞ്ഞു.

ദക്ഷിണാഫ്രിക്ക ടി20യിൽ മികച്ച ടീമാണെന്നും ശക്തരായ എതിരാളികൾക്കെതിരെ കളിക്കുന്നത് കൂടുതൽ നല്ലതാണെന്നും പാണ്ഡ്യ കൂട്ടിച്ചേർത്തു.