രണ്ടാം ടി20 ഇന്ന്: പരമ്പരയിലേക്ക് തിരിച്ച് വരാൻ ദക്ഷിണാഫ്രിക്ക

സെഞ്ചൂറിയൻ: ദക്ഷിണാഫ്രിക്കയെ സംബന്ധിച്ചിടത്തോളം ഏറെ നിർണായകമാണ് സെഞ്ചൂറിയനിലെ രണ്ടാം ട്വൻറി20 മത്സരം. ഏകദിന പരമ്പരയിലെ കനത്ത പരാജയത്തിന് ശേഷം തിരിച്ച് വരാൻ ദക്ഷിണാഫ്രിക്ക കിണഞ്ഞ് പരിശ്രമിക്കുകയാണ്. മൂന്നാം ടെസ്റ്റ് മുതൽ പിന്നീടിങ്ങോട്ട് ഒരേയൊരു മത്സരത്തിൽ മാത്രമാണ് ടീമിന് ഇന്ത്യക്കെതിരെ ജയിക്കാനായത്.

മുൻനിര താരങ്ങളുടെ പരിക്ക് ദക്ഷിണാഫ്രിക്കയെ ബാധിച്ചുവെങ്കിലും ടെസ്റ്റിൽ ഫാസ്റ്റ് ബൗളിങ് നിര കാഴ്ച വെച്ച മികച്ച പ്രകടനമൊഴിച്ചാൽ ആഹ്ലാദിക്കാനുള്ള ഒരു കാര്യവും അവ‍ർക്കില്ല. ഇന്ത്യയെ സംബന്ധിച്ചിടത്തോളം ഇന്ന് ജയിച്ചാൽ പരമ്പര സ്വന്തമാക്കാം.

ചരിത്രത്തിൽ ആദ്യമായി ഏതെങ്കിലും ഒരു ഫോ‍ർമാറ്റിൽ ദക്ഷിണാഫ്രിക്കയിൽ പരമ്പര വിജയിച്ച വിരാട് കോഹ്‍ലിയും കൂട്ടരും തികഞ്ഞ ആത്മവിശ്വാസത്തോടെയാണ് രണ്ടാം ടി20ക്ക് ഇറങ്ങുന്നത്.