രോഹിതിനെ മറികടന്നു; ട്വൻറി20യിൽ വിരാട് കോഹ‍്‍ലിക്ക് അപൂ‍ർവ റെക്കോ‍ർഡ്

മൊഹാലി: അന്താരാഷ്ട്ര ട്വൻറി20 ക്രിക്കറ്റിലെ റൺ വേട്ടക്കാരിൽ ഒന്നാമനായി ഇന്ത്യൻ നായകൻ വിരാട് കോഹ‍്‍ലി. ദക്ഷിണാഫ്രിക്കക്ക് എതിരെ മൊഹാലിയിൽ അർധശതകം നേടിയതോടെയാണ് കോഹ‍്‍ലി രോഹിത് ശർമയെ മറികടന്ന് റെക്കോർഡ് സ്വന്തമാക്കിയത്. മത്സരത്തിൽ 52 പന്തിൽ നിന്ന് 72 റൺസ് നേടിയ കോഹ‍്‍ലി മാൻ ഓഫ് ദി മാച്ച് പുരസ്കാരവും നേടി.

വെസ്റ്റ് ഇൻഡീസ് പര്യടനത്തിന് ശേഷം ദക്ഷിണാഫ്രിക്കക്ക് എതിരെയും കോഹ‍്‍ലി മികച്ച ഫോം തുടരുകയാണ്. കോഹ‍്‍ലിക്ക് ഇപ്പോൾ ടി20യിൽ ആകെ 2441 റൺസാണ് ഉള്ളത്. രോഹിത് ശർമയ്ക്ക് 2434 റൺസുണ്ട്. 97 ട്വൻറി20 മത്സരങ്ങളാണ് രോഹിത് കളിച്ചിട്ടുള്ളത്.

Watch Video: ബ്രില്ല്യൻറ് സൂപ്പർമാൻ; മൊഹാലിയിൽ വിരാടിൻെറ അത്ഭുതപ്പെടുത്തുന്ന ക്യാച്ച്!

നിലവിൽ ഇരുവരും തമ്മിൽ നേരിയ വ്യത്യാസം മാത്രമാണ് ഇക്കാര്യത്തിൽ ഉള്ളത്. 71 മത്സരങ്ങളിൽ നിന്ന് 50.85 ശരാശരിയോടെയാണ് കോഹ‍്‍ലി ഒന്നാം സ്ഥാനത്ത് നിൽക്കുന്നത്. 22ാം അർധശതകമാണ് ദക്ഷിണാഫ്രിക്കക്ക് എതിരെ നേടിയത്. ഈ വർഷം ടി20യിൽ ഏറ്റവും കൂടുതൽ റൺസ് നേടിയിട്ടുള്ള ബാറ്റ്സ്മാനും കോഹ്ലി തന്നെയാണ്.


ടി20 ക്രിക്കറ്റിൽ ഒന്നും രണ്ടും സ്ഥാനത്തായി കോഹ‍്‍ലിയും രോഹിതും മത്സരം തുടരുകയാണ്. ഓരോ കളിയിലും ഇരുവർക്കും പരസ്പരം മറികടക്കാമെന്ന രീതിയിലാണ് കാര്യങ്ങൾ.