​ഡൽഹി ടെസ്റ്റിൽ ശ്രീലങ്കക്ക് 410 റൺസ് വിജയ ലക്ഷ്യം

ന്യൂഡൽഹി: ഇന്ത്യയും ശ്രീലങ്കയും തമ്മിലുള്ള മൂന്നാം ക്രിക്കറ്റ് ടെസ്റ്റിൽ ലങ്കക്ക് വിജയിക്കാൻ 410 റൺസ് വേണം. രണ്ടാം ഇന്നിങ്സിൽ ഇന്ത്യ അഞ്ച് വിക്കറ്റ് നഷ്ടത്തിൽ 246 റൺസെടുത്ത് ഡിക്ലയർ ചെയ്തു. ക്യാപ്റ്റൻ വിരാട് കോഹ്‍ലി, ശിഖ‍ർ ധവാൻ, രോഹിത് ശർമ്മ എന്നിവ‍ർ ഇന്ത്യക്കായി അർധസെഞ്ച്വറികൾ നേടി.

ശ്രീലങ്കയുടെ ഒന്നാം ഇന്നിങ്‍സ് 373 റൺസിന് അവസാനിച്ചിരുന്നു. സെഞ്ച്വറി നേടിയ ക്യാപ്റ്റൻ ദിനേശ് ചണ്ഡിമലിൻെറയും ഏയ്ഞ്ചലോ മാത്യൂസിൻെറയും മികവിലാണ് ലങ്ക 373 റൺസ് അടിച്ചെടുത്തത്. ആർ.അശ്വിനും ഇശാന്ത് ശർമ്മയും മൂന്ന് വീതം വിക്കറ്റുകൾ വീഴ്ത്തി.

536 റൺസെടുത്ത് ഡിക്ലയർ ചെയ്ത ഇന്ത്യക്ക് ആദ്യ ഇന്നിങ്സിൽ 163 റൺസിൻെറ ലീഡ് ലഭിച്ചിരുന്നു. ബാറ്റിങ് ആരംഭിച്ച ലങ്ക നിലവിൽ വിക്കറ്റൊന്നും നഷ്ടപ്പെടാതെ 12 റൺസെടുത്തിട്ടുണ്ട്.