ഡൽഹി ടെസ്റ്റിൽ ഇന്ത്യക്കെതിരെ ശ്രീലങ്ക 9 വിക്കറ്റിന് 356

ന്യൂഡൽഹി: ഇന്ത്യയും ശ്രീലങ്കയും തമ്മിലുള്ള മൂന്നാം ക്രിക്കറ്റ് ടെസ്റ്റിൻെറ മൂന്നാം ദിനം കളി അവസാനിപ്പിക്കുമ്പോൾ ലങ്ക 9 വിക്കറ്റ് നഷ്ടത്തിൽ 356 റൺസെടുത്തു. ലങ്കക്ക് വേണ്ടി ക്യാപ്റ്റൻ ദിനേശ് ചണ്ഡിമലും ഏയ്ഞ്ചലോ മാത്യൂസും സെഞ്ച്വറി നേടി.

ഇരുവരും ചേ‍‍ർന്നുള്ള കൂട്ടുകെട്ടാണ് ടീമിനെ തുടക്കത്തിലെ തക‍ർച്ചയിൽ നിന്ന് കരകയറ്റിയത്. മാത്യൂസ് 111 റൺസെടുത്ത് പുറത്തായി. ചണ്ഡിമൽ 147 റൺസെടുത്ത് ക്രീസിലുണ്ട്. രണ്ടാം ദിനം തന്നെ ലങ്കയുടെ ആദ്യ മൂന്ന് വിക്കറ്റുകൾ വീണിരുന്നു. ഇവിടെ നിന്നാണ് ഇരുവരും തമ്മിലുള്ള കൂട്ടുകെട്ട് ടീമിനെ മുന്നോട്ട് നയിച്ചത്.

മാത്യൂസിനെ അശ്വിൻ പുറത്താക്കിയതിന് ശേഷം വീണ്ടും ലങ്കൻ നിര തകരുകയായിരുന്നു. അശ്വിൻ മൂന്ന് വിക്കറ്റുകൾ വീഴ്ത്തി. നേരത്തെ ആദ്യ ഇന്നിങ്സിൽ വിരാട് കോഹ്‍ലിയുടെ ഡബിൾ സെഞ്ച്വറിയുടെയും മുരളി വിജയുടെ സെഞ്ച്വറിയുടെയും മികവിൽ ഇന്ത്യ 536 റൺസെടുത്തിരുന്നു.