മൊഹാലിയിൽ നാളെ ഇന്ത്യക്ക് ജീവൻ മരണ പോരാട്ടം

മൊഹാലി: ശ്രീലങ്കക്കെതിരെ നാളെ നടക്കുന്ന രണ്ടാം ഏകദിന മത്സരത്തിൽ വിജയത്തിൽ കുറഞ്ഞതൊന്നും ഇന്ത്യ ലക്ഷ്യമിടുന്നില്ല. ആദ്യ മത്സരത്തിൽ നാണം കെട്ട തോൽവിയേറ്റ് വാങ്ങിയ ടീമിന് പരമ്പരയിൽ തിരിച്ച് വരണമെങ്കിൽ മത്സരം വിജയിച്ചേ പറ്റൂ.

ആദ്യ മത്സരത്തിലെ പരാജയം ഇന്ത്യയെ സംബന്ധിച്ചിടത്തോളം കണ്ണ് തുറപ്പിക്കുന്നതായിരുന്നു. ഈയടുത്ത് ഇന്ത്യയിൽ നടന്ന എല്ലാ മത്സരങ്ങളിലും ആധികാരികമായ പ്രകടനം കാഴ്ച വെച്ച ടീം ഇത്ര ദാരുണമായി തകരുമെന്ന് ആരും കരുതിയിരുന്നില്ല.

മഹേന്ദ്ര സിങ് ധോണി എന്ന പരിചയ സമ്പന്നനായ താരത്തിൻെറ പ്രകടനം ഇല്ലായിരുന്നെങ്കിൽ ഇന്ത്യക്ക് ഒരിക്കലും മറക്കാനാവാത്ത നാണക്കേടാവുമായിരുന്നു മത്സരം. ധരംശാലയിലെ അത് പോലല്ലെങ്കിലും മൊഹാലിയിലും പിച്ച് ഇന്ത്യൻ ബാറ്റ്സ്മാൻമാർക്ക് വെല്ലുവിളിയാവുമെന്ന് തന്നെയാണ് വിലയിരുത്തൽ.

രാവിലെ 11.30നാണ് രണ്ടാം ഏകദിനം ആരംഭിക്കുക. ധരംശാലയിൽ നിന്ന് പാഠം പഠിച്ച ഇന്ത്യൻ ടീം ശക്തമായി തിരിച്ച് വരുമെന്ന് ക്യാപ്റ്റൻ രോഹിത് ശർമ്മ പറഞ്ഞു.