ഇൻഡോറിൽ ഇന്ത്യക്കെതിരെ പൊരുതി നോക്കാൻ ശ്രീലങ്ക

ഇൻഡോർ: ഏകദിന പരമ്പരയും ടെസ്റ്റ് പരമ്പരയും നാണം കെട്ട് തോറ്റു. ആദ്യ ട്വൻറി20യിലും തോൽവിയേറ്റു വാങ്ങി. ഓരോ മത്സരവും കഴിയുന്തോറും കൂടുതൽ കരുത്തരാവുന്ന ഇന്ത്യക്കെതിരെ ഇനി ലങ്കക്ക് തോൽക്കാതിരിക്കാൻ പൊരുതി നോക്കാം എന്ന രീതിയിലാണ് കാര്യങ്ങൾ.

കട്ടക്കിൽ നടന്ന ആദ്യ ട്വൻറി20 മത്സരത്തിൽ ബാറ്റിങിലും ബൗളിങിലും ലങ്ക അമ്പേ പരാജയപ്പെടുകയായിരുന്നു. പൊരുതാൻ പോലുമാവാതെ അവ‍ർ തോൽവിയേറ്റു വാങ്ങി. ഏകദിന പരമ്പര 2-1ന് സ്വന്തമാക്കിയ ഇന്ത്യ ട്വൻറി20യിൽ 1-0ന് മുന്നിട്ട് നിൽക്കുന്നു.

ഇന്ന് ജയിച്ചാൽ തന്നെ ഇന്ത്യക്ക് പരമ്പര സ്വന്തമാവും. വിജയിച്ചാൽ ലങ്കക്കെതിരായ ടെസ്റ്റ്, ഏകദിന ടി20 പരമ്പരകൾ വിജയിച്ച് ആത്മവിശ്വാസത്തോടെ ഇന്ത്യക്ക് ദക്ഷിണാഫ്രിക്കൻ പര്യടനത്തിന് ഇറങ്ങാം. ഇൻഡോറിൽ രാത്രി ഏഴിനാണ് ഇന്ത്യയും ലങ്കയും തമ്മിലുള്ള രണ്ടാം ട്വൻറി20 മത്സരം നടക്കുന്നത്.