വെസ്റ്റ് ഇൻഡീസിനെതിരെ മൂന്ന് മത്സരങ്ങളുടെ പരമ്പര
മൂന്ന് ടി20യും മൂന്ന് ഏകദിനങ്ങളുമാണ് ഇന്ത്യ വെസ്റ്റ് ഇൻഡീസിനെതിരെ കളിക്കുക. ഡിസംബർ ആറിനാണ് ആദ്യ ടി20. ലോക ക്രിക്കറ്റിലെ ശക്തരായ ടി20 ടീമുകളിൽ ഒന്നാണ് വെസ്റ്റ് ഇൻഡീസിൻേറത്. നാട്ടിലാണെങ്കിൽ പോലും അവരെ എളുപ്പത്തിൽ പരാജയപ്പെടുത്താമെന്ന് ഇന്ത്യ കരുതുന്നുണ്ടാവില്ല. ക്രിക്കറ്റിലെ ഏറ്റവും ചെറിയ ഫോർമാറ്റിൽ വ്യക്തിഗത പ്രകടനങ്ങൾ വളരെ നിർണായകമാണ്. ഒരു കളിക്കാരൻ മതി ടി20യിൽ മത്സരം തന്നെ മാറ്റിമറിക്കാൻ. ഇന്ത്യയെ സംബന്ധിച്ചിടത്തോളം മൂന്ന് താരങ്ങളുടെ പ്രകടനം നിർണായകമാണ്. ഇനിയും ഫോമിലെത്തിയില്ലെങ്കിൽ സെലക്ടർമാർക്ക് പോലും അവരെ രക്ഷിക്കാനായെന്ന് വരില്ല.
കുൽദീപ് യാദവ്
ചെറിയൊരു ഇടവേളക്ക് ശേഷമാണ് കുൽദീപ് യാദവ് ഇന്ത്യയുടെ ടി20 ടീമിൽ സ്ഥാനം പിടിക്കുന്നത്. ടെസ്റ്റിലും ഇന്ത്യയുടെ ഒന്നാം നമ്പർ ചോയ്സല്ല നിലവിൽ കുൽദീപ്. അശ്വിനും ജഡേജയും കഴിഞ്ഞാൽ മാത്രമേ താരത്തെ പരിഗണിക്കുകയുള്ളൂ. ഏകദിനത്തിൽ മാത്രമാണ് താരത്തിന് ടീമിൽ സ്ഥാനം ഉറപ്പുള്ളത്. എന്നാൽ അവിടെയും സാഹചര്യത്തിന് അനുസരിച്ച് ടീം ഫോർമേഷനിൽ മാറ്റം വരുമ്പോൾ കുൽദീപ് പുറത്താവാറുണ്ട്. വിൻഡീസിനെതിരായ പരമ്പര ഇന്ത്യൻ സ്പിന്നർക്ക് വലിയ അവസരമാണ്. പ്രതിഭ തെളിയിച്ചാൽ ടി20 ലോകകപ്പ് ടീമിലേക്ക് തന്നെ സ്ഥാനം പിടിക്കാം. ഇല്ലെങ്കിൽ ഇത് കുൽദീപിനെ സംബന്ധിച്ചിടത്തോളം അവസാന അവസരമായേക്കും.
കെഎൽ രാഹുൽ
ഇന്ത്യൻ ക്രിക്കറ്റിൽ നിലവിലുള്ള മികച്ച ടി20 താരങ്ങളിൽ ഒരാളാണെങ്കിലും സ്ഥിരതയില്ലായ്മയാണ് രാഹുലിൻെറ ഏറ്റവും വലിയ പ്രശ്നം. ബംഗ്ലാദേശിനെതിരായ പരമ്പരയിൽ അവസാന ടി20 ഒഴിച്ചാൽ രാഹുലിന് കാര്യമായി ഒന്നും ചെയ്യാൻ സാധിച്ചിരുന്നില്ല. മധ്യനിര ബാറ്റ്സ്മാൻ എന്ന നിലയിൽ ഇനിയും പരാജയമായാൽ രാഹുലിനെ മറികടന്ന് ടീമിലെത്താൻ പ്രതിഭയുള്ള താരങ്ങൾ പുറത്തുണ്ട്. വെസ്റ്റ് ഇൻഡീസിനെതിരായ പരമ്പരയിൽ ശിഖർ ധവാന് പകരം രാഹുലായിരിക്കും ഇന്ത്യയുടെ ഓപ്പണറാവുക. അവസരം മുതലാക്കിയാൽ രാഹുലിന് പ്രതീക്ഷയ്ക്ക് വകയുണ്ട്. അല്ലെങ്കിൽ ഇനിയും വിമർശനം താങ്ങുകയെന്നത് എളുപ്പമാവില്ല.
റിഷഭ് പന്ത്
കഴിഞ്ഞ കുറച്ച് കാലമായി ഇന്ത്യൻ ക്രിക്കറ്റിലെ ചർച്ചാവിഷയമാണ് റിഷഭ് പന്ത്. മഹേന്ദ്ര സിങ് ധോണിയെ പോലെ ഒരു ഇതിഹാസ താരത്തിന് പകരക്കാരനാവുകയെന്നത് പെട്ടെന്ന് സാധിക്കുന്ന കാര്യമല്ല. എന്നാൽ പ്രതീക്ഷക്ക് വക നൽകുന്ന ഒരു പ്രകടനം പോലും ഈയടുത്തൊന്നും പന്തിൻെറ ഭാഗത്ത് നിന്നുണ്ടായിട്ടില്ല. ബംഗ്ലാദേശിനെതിരായ പരമ്പരയിൽ വിക്കറ്റിന് പിന്നിലും ബാറ്റ്സ്മാൻ എന്ന നിലയിലും പന്ത് പരാജയമായി. വെസ്റ്റ് ഇൻഡീസിനെതിരെ സഞ്ജു സാംസണും ഇന്ത്യൻ ടീമിലുണ്ട്. ഇനിയൊരു സീരീസ് കൂടി പരാജയമായാൽ പന്തിനെ സെലക്ടർമാർ എന്ത് പറഞ്ഞ് ടീമിൽ നിലനിർത്തുമെന്ന് കാത്തിരുന്നത് തന്നെ കാണണം.