ഇന്ത്യ - വെസ്റ്റ് ഇന്‍ഡീസ് മത്സരം വേണ്ടെന്ന് കെസിഎ

നവംബര്‍ ഒന്നിന് തിരുവനന്തപുരത്ത് നടത്താന്‍ തീരുമാനമായ ഇന്ത്യ - വെസ്റ്റ് ഇന്‍ഡീസ് മത്സരം കേരളത്തിന് വേണ്ടെന്ന് കേരളാ ക്രിക്കറ്റ് അസോസിയേഷന്‍. നവംബറിന് പകരം ജനുവരിയിലെ ഓസ്‌ട്രേലിയക്കെതിരായ മത്സരം അനുവദിക്കണമെന്നാണ് കെ.സി.എയുടെ ആവശ്യം. നവംബറില്‍ കേരളത്തില്‍ മഴ സീസണ്‍ ആയതിനാലാണ് മത്സരം മാറ്റണമെന്ന് കെസിഎ പറഞ്ഞിരിക്കുന്നത്.

കാലാവസ്ഥ അനുകൂലമല്ലാത്തതിനാല്‍ മത്സരം മാറ്റി നല്‍കുന്നതാണ് നല്ലതെന്ന് കാട്ടിയാകും കത്ത് നല്‍കുക. എന്നാല്‍, ഒരു അന്താരാഷ്ട്ര മത്സരം സംസ്ഥാനത്തിന് ലഭിക്കാനുള്ള പ്രയാസം മറന്നുകൊണ്ടാണ് കെസിഎ സെക്രട്ടറി രംഗത്തെത്തിയിരിക്കുന്നത്. നവംബറില്‍ ബിസിസിഐ മത്സരം അനുവദിച്ചതിനാല്‍ ഇപ്പോള്‍ നടത്താനായില്ലെങ്കില്‍ അടുത്തെങ്ങും കേരളത്തില്‍ മത്സരം ലഭിക്കണമെന്നില്ല.അതേസമയം, നവംബറിലെ മത്സരത്തിന് പകരം ജനുവരിയില്‍ മത്സരം ലഭിച്ചാല്‍ തിരുവനന്തപുരത്ത് തന്നെ വേദിയൊരുക്കുമെന്നും കെസിഎ സെക്രട്ടറി വ്യക്തമാക്കിയിട്ടുണ്ട്.