India vs Australia: അഡലെയ‍്‍ഡ് ടെസ്റ്റിൽ ഇന്ത്യക്ക് ചരിത്രവിജയം

അഡലെയ‍്‍ഡ്: ഓസ്ട്രേലിയക്കെതിരായ ഒന്നാം ക്രിക്കറ്റ് ടെസ്റ്റിൽ ഇന്ത്യക്ക് ചരിത്രവിജയം. അവസാനദിനം 31 റൺസിനാണ് ഇന്ത്യ മിന്നുന്ന വിജയം സ്വന്തമാക്കിയത്. ഇതാദ്യമായാണ് ഓസ്ട്രേലിയയിൽ ഇന്ത്യ ഒരു പരമ്പരയിലെ ആദ്യ ടെസ്റ്റ് വിജയിക്കുന്നത്.

ഓസ്ട്രേലിയക്കായി അവസാന ഘട്ടത്തിൽ വാലറ്റക്കാർ പിടിച്ചു നിൽക്കാൻ ശ്രമിച്ചെങ്കിലും ഇന്ത്യൻ ബോളർമാർ മത്സരം കൈപ്പിടിയിലാക്കുകയായിരുന്നു. 323 റൺസ് വിജയലക്ഷ്യവുമായി ഇറങ്ങിയ ഓസീസിൻെറ രണ്ടാം ഇന്നിങ്സ് 291 റൺസിൽ അവസാനിച്ചു. ഇന്ത്യക്കായി ബുംറ, അശ്വിൻ, ഷമി എന്നിവർ മൂന്ന് വീതം വിക്കറ്റുകൾ വീഴ്ത്തി.


പത്ത് വർഷത്തിന് ശേഷമാണ് ഇന്ത്യ ഓസീസ് മണ്ണിൽ ഒരു ടെസ്റ്റ് മത്സരം വിജയിക്കുന്നത്. നാല് മത്സരങ്ങളുടെ പരമ്പരയിൽ നിലവിൽ ഇന്ത്യ 1-0ന് മുന്നിലാണ്. രണ്ട് ഇന്നിങ്സിലും മികച്ച ബാറ്റിങ് പ്രകടനം കാഴ്ച വെച്ച ചേതേശ്വർ പൂജാരയുടെ പ്രകടനമാണ് ഇന്ത്യൻ വിജയത്തിൽ നിർണായകമായത്.

ആദ്യ ഇന്നിങ്സിൽ പൂജാര സെഞ്ച്വറി നേടിയപ്പോൾ രണ്ടാം ഇന്നിങ്സിൽ അർധശതകം നേടി. അജിങ്ക്യ രഹാനെയാണ് ഇന്ത്യൻ ബാറ്റിങ് നിരയിൽ തിളങ്ങിയ മറ്റൊരു താരം. ബുംറ, അശ്വിൻ, ഷമി, ഇശാന്ത് ശർമ്മ എന്നിവരുടെ ബോളിങ് മികവും ഇന്ത്യൻ വിജയത്തിന് പ്രധാന ഘടകമായി.