പാകിസ്ഥാനിലാണെങ്കിൽ ഇന്ത്യ ഏഷ്യാ കപ്പിനില്ല; നിലപാട് വ്യക്തമാക്കി ബിസിസിഐ

ന്യൂഡൽഹി: 2020ലെ ഏഷ്യ കപ്പ് ക്രിക്കറ്റ് ടൂർണമെൻറ് പാകിസ്ഥാനിലാണ് നടക്കുന്നതെങ്കിൽ ഇന്ത്യ പങ്കെടുക്കില്ലെന്ന് വ്യക്തമാക്കി ബിസിസിഐ. പാകിസ്ഥാൻ ക്രിക്കറ്റ് ബോർഡ് ഏഷ്യാ കപ്പ് നടത്തിപ്പിനായി അവകാശവാദം ഉന്നയിച്ചിട്ടുണ്ട്. ഇപ്പോഴും എവിടെയാണ് ഏഷ്യാകപ്പ് നടത്തുന്നതെന്ന് തീരുമാനിച്ചിട്ടില്ല. എന്നാൽ ഇന്ത്യൻ ടീം ഒരു കാരണവശാലും പാകിസ്ഥാൻ സന്ദർശിക്കില്ലെന്ന നിലപാടിലാണ് ബിസിസിഐ.

"ഏഷ്യാകപ്പിന് പാകിസ്ഥാൻ ക്രിക്കറ്റ് ബോർഡ് ആതിഥ്യം വഹിക്കുന്നുവെന്നതല്ല പ്രശ്നം. മത്സരങ്ങൾ എവിടെ വെച്ച് നടക്കുമെന്നതാണ് വിഷയം. ഇന്ത്യക്ക് ഒരു നിഷ്പക്ഷ വേദി വേണമെന്നാണ് അഭിപ്രായം. ഇന്ത്യ ഇല്ലാത്ത ഒരു ഏഷ്യാകപ്പ് ഏഷ്യൻ ക്രിക്കറ്റ് കൗൺസിൽ തയ്യാറാണെങ്കിൽ അത് നടക്കട്ടെ. പക്ഷേ, ഇന്ത്യ പങ്കെടുക്കുന്നുണ്ടെങ്കിൽ വേദി പാകിസ്ഥാൻ ആവാൻ പാടില്ല," ബിസിസിഐ ഒഫീഷ്യൽ ഐഎഎൻസിനോട് പറഞ്ഞു.

Also Read: മൂന്നാം ടി20യിൽ ഇന്ത്യൻ ടീമിൽ മാറ്റം ഉണ്ടായേക്കും; ഇനിയും ആ താരത്തെ ഉൾപ്പെടുത്തിയേക്കില്ല, ടീം സാധ്യതകൾ ഇങ്ങനെ!

ഏഷ്യാകപ്പ് ഇത്തവണ നടത്താൻ തീരുമാനിച്ച് ഉറച്ചിരിക്കുകയാണ് പാകിസ്ഥാൻ. ശ്രീലങ്ക, വെസ്റ്റ് ഇൻഡീസ്, ബംഗ്ലാദേശ് എന്നീ രാജ്യങ്ങൾ ഈയടുത്ത് പാകിസ്ഥാനിൽ ക്രിക്കറ്റ് പരമ്പരകൾ കളിച്ചിരുന്നു. ഏഷ്യാകപ്പ് വിജയകരമായി നടത്താനായാൽ അന്താരാഷ്ട്ര വേദിയെന്ന പദവി തിരിച്ച് പിടിക്കാമെന്ന പ്രതീക്ഷയിലാണ് പാകിസ്ഥാൻ.

Also Read: മെല്‍ബണില്‍ വിംബിള്‍ഡണ്‍ ഫൈനല്‍! ഫെഡററും ജൊകോവിചും ഏറ്റുമുട്ടുമ്പോള്‍ മണിക്കൂറുകള്‍ മതിയാകില്ല

2018ൽ ബിസിസിഐ ഏഷ്യാകപ്പിന് ആതിഥേയത്വം വഹിച്ചപ്പോൾ വിസാ പ്രശനങ്ങൾ കാരണം പാകിസ്ഥാൻ ക്രിക്കറ്റ് ടീം ഇന്ത്യയിലെത്താൻ തയ്യാറായിരുന്നില്ല. യുഎഇയിൽ വെച്ചാണ് പിന്നീട് മത്സരങ്ങൾ നടത്തിയത്. ഇതേ രീതി പിന്തുടരണമെന്ന് ബിസിസിഐ ആവശ്യപ്പെടുന്നു.