നാലാം നമ്പറിലെ അനിശ്ചിതത്വം പരിഹരിക്കാൻ സുരേഷ് റെയ്‍‍ന വരുമോ ? ടി20 ലോകകപ്പ് ടീമിലേക്ക് വൻ ട്വിസ്റ്റ് ?!!

ന്യൂഡൽഹി: ട്വൻറി20 ലോകകപ്പിലെ ഇന്ത്യൻ ക്രിക്കറ്റ് ടീമിൽ ഒരു വലിയ ട്വിസ്റ്റിന് സാധ്യതയുണ്ടെന്ന് സൂചന നൽകി തിരിച്ചുവരവിന് ആഗ്രഹം പ്രകടിപ്പിച്ച് സീനിയർ താരം സുരേഷ് റെയ്‍‍ന. ടീമിൽ ഒരങ്കത്തിന് കൂടി ബാല്യമുണ്ടെന്ന് 32കാരനായ താരത്തിന് ആത്മവിശ്വാസമുണ്ട്.

ഏകദിന ലോകകപ്പിൽ ഇന്ത്യൻ ടീമിൻെറ ഏറ്റവും വലിയ തലവേദനയായിരുന്നു ദുർബലമായ മധ്യനിര. ഇപ്പോഴും നാലാം നമ്പറിലെ അനിശ്ചിതത്വം പരിഹരിക്കാൻ സാധിച്ചിട്ടില്ല. ഋഷഭ് പന്ത്, ശ്രേയസ് അയ്യർ, മനീഷ് പാണ്ഡെ എന്നിവരെയാണ് നാലാം നമ്പറിൽ ഇന്ത്യ പരിഗണിക്കുന്നത്.

Read More: 2019 ലോകകപ്പിൽ കളിക്കാൻ ആഗ്രഹമുണ്ടായിരുന്നു, സെമിയിലെ ആ തീരുമാനം ഞെട്ടിച്ചു: വെളിപ്പെടുത്തലുമായി യുവരാജ്

ഇതിനിടയിലാണ് റെയ്‍‍ന തിരിച്ചുവരവിനായി ആഗ്രഹം പ്രകടിപ്പിക്കുന്നത്. 2018ൽ ഇംഗ്ലണ്ടിനെതിരെയാണ് അദ്ദേഹം അവസാനമായി ഇന്ത്യക്ക് വേണ്ടി കളിച്ചിട്ടുള്ളത്. പരിക്കും ഫിറ്റ്നസ് പ്രശ്നങ്ങളും കാരണമാണ് റെയ്‍‍ന പിന്നീട് പരിഗണിക്കപ്പെടാതെ പോയത്.

"നാലാം നമ്പറിൽ കളിക്കാൻ എനിക്ക് സാധിക്കും. നേരത്തെ ആ നമ്പറിൽ ഞാൻ കളിക്കുകയും നന്നായി സ്കോർ ചെയ്യുകയും ചെയ്തിട്ടുണ്ട്. രണ്ട് ടി20 ലോകകപ്പുകളിൽ കളിക്കാനാണ് ഞാൻ ലക്ഷ്യമിടുന്നത്," റെയ്‍‍ന പറഞ്ഞു. ഇന്ത്യയുടെ ഏറ്റവും മികച്ച ടി20 ബാറ്റ്സ്മാൻമാരിൽ ഒരാളാണ് റെയ്‍‍ന.

Read More: സച്ചിനും കോലിയും അല്ല, ഇന്ത്യയിൽ ഏറ്റവും കൂടുതൽ ആരാധകരുള്ള ക്രിക്കറ്റർ ഈ താരം; സർവേഫലം പുറത്ത്

193 ഐപിഎൽ മത്സരങ്ങളിൽ നിന്ന് അദ്ദേഹം 5368 റൺസെടുത്തിട്ടുണ്ട്. 78 ട്വൻറി20 മത്സരങ്ങളിൽ നിന്നായി 1601 റൺസ് നേടിയ അദ്ദേഹം രണ്ട് സെഞ്ച്വറികളും നേടിയിട്ടുണ്ട്. മഹേന്ദ്ര സിങ് ധോണിയുടെ നേതൃത്വത്തിൽ ടീം ഇന്ത്യ ടി20 ലോകകിരീടം നേടിയപ്പോൾ ടീമിലെ പ്രധാനതാരം ആയിരുന്നു റെയ്‍‍ന.

പ്രായവും ഫിറ്റ്നസും പരിഗണിക്കുമ്പോൾ റെയ്‍‍ന ടീം ഇന്ത്യയിലേക്ക് തിരികെ എത്തുമോ എന്ന കാര്യത്തിൽ കാര്യങ്ങൾ അത്ര പന്തിയല്ല. യുവതാരങ്ങളുടെ നിരയെയാണ് ടീം ഇപ്പോൾ വാർത്തെടുക്കുന്നത്. ലോകകപ്പിന് മുമ്പുള്ള ഐപിഎല്ലായിരിക്കും റെയ്‍‍നയുടെ കാര്യത്തിൽ നിർണായകമാവുക.