വേണുഗോപാൽ റാവു ക്രിക്കറ്റിൽ നിന്ന് വിരമിച്ചു

ന്യൂഡൽഹി: ഇന്ത്യൻ ക്രിക്കറ്റർ വേണുഗോപാൽ റാവു ക്രിക്കറ്റിൽ നിന്ന് വിരമിക്കുന്നതായി പ്രഖ്യാപിച്ചു. 37കാരനായ താരം 16 ഏകദിനങ്ങളിൽ ഇന്ത്യക്കായി കളിച്ചിട്ടുണ്ട്. 2006ൽ പാകിസ്ഥാനെതിരെ നേടിയ 61 റൺസാണ് ഏറ്റവും ഉയർന്ന സ്കോർ. ആന്ധ്രയിൽ നിന്നുള്ള മധ്യനിര ബാറ്റ്സ്മാനായ റാവുവിൻെറ അരങ്ങേറ്റമത്സരം 2005ൽ ശ്രീലങ്കക്കെതിരെയായിരുന്നു.

2006ൽ ഇന്ത്യയുടെ വെസ്റ്റ് ഇൻഡീസ് പര്യടനത്തിലാണ് അവസാന അന്താരാഷ്ട്ര മത്സരം കളിച്ചത്. മത്സരത്തിൽ 11 റൺസെടുത്ത് അദ്ദേഹം പുറത്തായിരുന്നു. ഇന്ത്യ നാല് വിക്കറ്റിന് തോൽക്കുകയും ചെയ്തു. 218 റൺസ് മാത്രമാണ് ആകെ കളിച്ച മത്സരങ്ങളിൽ നിന്ന് അദ്ദേഹം ടീമിനായി സ്കോർ ചെയ്തിട്ടുള്ളത്.

Read More: പൃഥ്വി ഷായ്ക്ക് ക്രിക്കറ്റിൽ നിന്ന് വിലക്ക് പ്രഖ്യാപിച്ച് ബിസിസിഐ

121 ഫസ്റ്റ് ക്ലാസ് മത്സരങ്ങളിൽ നിന്നായി 17 സെഞ്ച്വറിയും 30 അർധസെഞ്ച്വറിയും നേടിയിട്ടുണ്ട്. ഇംഗ്ലണ്ട് ലയൺസിനെതിരെ നേടിയ 228 റൺസാണ് അദ്ദേഹത്തിൻെറ ഏറ്റവും ഉയർന്ന സ്കോർ. ആകെ 7081 റൺസാണ് ഫസ്റ്റ് ക്ലാസ് ക്രിക്കറ്റിൽ നേടിയിട്ടുള്ളത്. ഇന്ത്യൻ പ്രീമിയർ ലീഗിൽ ഡെക്കാൺ ചാർജേഴ്സിനായി 65 മത്സരങ്ങളും വേണുഗോപാൽ റാവു കളിച്ചിട്ടുണ്ട്.