ഇന്ത്യൻ താരങ്ങളെ ഇഷ്ടമല്ലെങ്കിൽ രാജ്യം വിടൂ; ആരാധകനോട് കോഹ‍്‍ലി

ന്യൂഡൽഹി: ഇന്ത്യൻ താരങ്ങളെ ഇഷ്ടമല്ലെന്ന് പറഞ്ഞ ആരാധകനോട് രാജ്യം വിട്ട് പൊയ്ക്കൂടേയെന്ന് വിരാട് കോഹ‍്‍ലി. ഓസ്ട്രേലിയയുടെയും ഇംഗ്ലണ്ടിൻെറയും ബാറ്റ്സ്മാൻമാരെയാണ് തനിക്ക് കൂടുതൽ ഇഷ്ടമെന്ന് പറഞ്ഞ ആരാധകനോടാണ് കോഹ‍്‍ലി പ്രതികരിച്ചത്. സോഷ്യൽ മീഡിയയിൽ ഇത് വൻവിവാദത്തിന് തുടക്കമിട്ടിരിക്കുകയാണ്.

സോഷ്യൽ മീഡിയയിലെ കമൻറുകൾ വായിച്ച് മറുപടി നൽകുകയായിരുന്നു കോഹ‍്‍ലി. ഇതിനിടയിലാണ്, കോഹ‍്‍ലിയുടെ ബാറ്റിങിൽ ഒരു പ്രത്യേകതയും ഇല്ലെന്ന് ഒരു ആരാധകൻ പ്രതികരിച്ചത്. ഇന്ത്യൻ താരങ്ങളെ ഇഷ്ടമല്ലെന്നും അദ്ദേഹം പറഞ്ഞു. ഇതോടെയാണ് കോഹ‍്‍ലി രൂക്ഷമായി മറുപടി പറഞ്ഞത്.

"ഇന്ത്യൻ താരങ്ങളെ ഇഷ്ടമല്ലെങ്കിൽ പിന്നെ എന്തിനാണ് ഇവിടെ നിൽക്കുന്നത്. മറ്റേതെങ്കിലും രാജ്യത്തേക്ക് പൊയ്ക്കൂടേ. അതല്ലേ നല്ലത്," ഇങ്ങനെ ആയിരുന്നു ഇന്ത്യൻ നായകൻെറ പ്രതികരണം. ഇതിൻെറ വീഡിയോ സോഷ്യൽ മീഡിയയിൽ പ്രചരിക്കുകയാണ്.