ഏറ്റവും പ്രിയപ്പെട്ടവനാണ് ആ കളിക്കാരൻ; പ്രിയ കായിക താരത്തെ വെളിപ്പെടുത്തി കോഹ‍്‍ലി

ന്യൂഡൽഹി: ക്രിക്കറ്റിനൊപ്പം തന്നെ വിരാട് കോഹ‍്‍ലിക്ക് ടെന്നീസും ഫുട്ബോളുമൊക്കെ പ്രിയമാണ്. ലോകകപ്പ് ഫുട്ബോൾ സമയത്ത് താനൊരു ജർമ്മനി ആരാധകനാണെന്ന് കോഹ‍്‍ലി പറഞ്ഞിരുന്നു. ടീമിന് എല്ലാം ആശംസകളും നേരുകയും ചെയ്തിരുന്നു. കായിക രംഗത്ത് തനിക്ക് ഏറ്റവും പ്രിയപ്പെട്ട താരങ്ങളിൽ ഒരാൾ ക്രിസ്റ്റ്യാനോ റൊണാൾഡോ ആണെന്ന് ഇപ്പോൾ വെളിപ്പെടുത്തിയിരിക്കുകയാണ് ഇന്ത്യൻ നായകൻ.

ലോക ഫുട്ബോളിൽ അർജൻറീന താരം ലയണൽ മെസിയേക്കാൾ തനിക്ക് പ്രിയപ്പെട്ടത് റൊണാൾഡോ ആണെന്ന് കോഹ‍്‍ലി പറഞ്ഞു. മെസിയേക്കാൾ മികച്ച കരിയർ റൊണാൾഡോയുടേതാണെന്നാണ് കോഹ‍്‍ലിയുടെ പക്ഷം. പ്രതിസന്ധികളിൽ കൂടുതൽ കരുത്തനാവുന്നത് റൊണാൾഡോ ആണ്.

"കായിക താരങ്ങളിൽ ഏറ്റവും പ്രചോദനം ഉണ്ടായിട്ടുള്ളത് റൊണാൾഡോയിൽ നിന്നാണ്. അദ്ദേഹമാണ് എല്ലാവരിലും മുകളിൽ നിൽക്കുന്നത്. അദ്ദേഹത്തിൻെറ കളിയോടുള്ള ആത്മാർഥതയും പ്രതിബദ്ധതയും വേറെ ആരിലും കാണാനാവില്ല. ഏറ്റവും മികച്ച പ്രകടനം പുറത്തെടുക്കാൻ ശ്രമിക്കുന്നത് എല്ലാ മത്സരത്തിലും കാണാം. അദ്ദേഹം കളിക്കുന്ന എല്ലാ ക്ലബ്ബുകളെയും ഞാനും ഇഷ്ടപ്പെടുന്നു," കോഹ‍്‍ലി പറഞ്ഞു.


വെസ്റ്റ് ഇൻഡീസിനെതിരായ ട്വൻറി20 മത്സരത്തിന് ഫ്ലോറിഡയിലെത്തിയ ഇന്ത്യൻ നായകൻ ഫിഫ ഡോട്ട് കോമിന് നൽകിയ അഭിമുഖത്തിലാണ് ഇക്കാര്യങ്ങൾ വ്യക്തമാക്കിയത്.

Read More: ലോകകപ്പ് സെമിയിൽ ധോണിയെ 7ാമനായി ഇറക്കിയതാര് ? വൻ വെളിപ്പെടുത്തലുമായി ബംഗാർ

ബ്രസീലിയൻ താരങ്ങളായ റൊണാൾഡോയുടെയും റൊണാൾഡീഞ്ഞോയുടെയും മത്സരങ്ങൾ താൻ ഏറെ ആസ്വദിക്കാറുള്ളയാളാണെന്നും കോഹ‍്‍ലി പറഞ്ഞു. ജർമൻ ഗോൾ കീപ്പർ ഒളിവർ ഖാൻ, ലയണൽ മെസി, ക്രൊയേഷ്യൻ താരം ലൂക്ക മോഡ്രിച്ച്, സ്പെയിന് ലോകകിരീടം സമ്മാനിച്ച താരങ്ങളായ ഇനിയെസ്റ്റ, സാവി എന്നിവരെല്ലാം ഫുട്ബോൾ രംഗത്ത് തൻെറ ഇഷ്ട കളിക്കാരാണെന്ന് കോഹ‍്‍ലി കൂട്ടിച്ചേർത്തു.

സുനിൽ ഛേത്രിയുടെ നേതൃത്വത്തിലുള്ള ഇന്ത്യൻ ഫുട്ബോൾ ടീം ഏറെ പ്രതീക്ഷ നൽകുന്നുണ്ടെന്നും കോഹ‍്‍ലി പറഞ്ഞു. ലോകകപ്പ് കളിക്കാൻ ഏറ്റവും യോഗ്യതയുള്ള കളിക്കാരിൽ ഒരാളാണ് ഛേത്രി. ഇന്ത്യൻ ടീം വൈകാതെ ലോകകപ്പ് കളിക്കുമെന്ന് പ്രതീക്ഷയുണ്ട്. മറ്റുള്ളവർക്ക് പ്രചോദനമാവുന്ന തരത്തിൽ ടീമിനെ നയിക്കുന്ന നായകനാണ് ഛേത്രിയെന്നും കോഹ‍്‍ലി കൂട്ടിച്ചേർത്തു.

Read More: ഇത് തൻെറ സ്വന്തം സ്ക്വാഡെന്ന് കോഹ‍്‍ലി; രോഹിത് എവിടെയെന്ന് ആരാധകർ