ധോണിക്ക് ഒപ്പമുള്ള ചിത്രം പോസ്റ്റ് ചെയ്തതിൻെറ കാരണം വെളിപ്പെടുത്തി കോഹ‍്‍ലി

ന്യൂഡൽഹി: ഇന്ത്യൻ നായകൻ വിരാട് കോഹ‍്‍ലിയുടെ ഒരു ട്വീറ്റ് കഴിഞ്ഞ ദിവസം വലിയ ചർച്ചകൾക്ക് വഴി വെച്ചിരുന്നു. മുൻ നായകൻ മഹേന്ദ്ര സിങ് ധോണിക്കൊപ്പമുള്ള ഒരു ഓർമ്മയായിരുന്നു അദ്ദേഹം പങ്കുവെച്ചത്. ടി20 ലോകകപ്പ് മത്സരത്തിനിടെ ധോണി തന്നെ ഫിറ്റ്നസ് ടെസ്റ്റിനെന്ന പോലെ ഓടിച്ചുവെന്ന് അദ്ദേഹം ഓർമ്മിച്ചു.

പക്ഷേ ആരാധകർ ആ ചിത്രം ധോണി വിരമിക്കാൻ പോവുന്നതിൻെറ സൂചനയായാണ് എടുത്തത്. ഒടുവിൽ ബിസിസിഐയും ഇന്ത്യൻ സെലക്ടർ എംഎസ്കെ പ്രസാദും ധോണിയുടെ ഭാര്യം സാക്ഷി ധോണിയും വരെ ഇക്കാര്യത്തിൽ വിശദീകരണവുമായി രംഗത്തെത്തി.

Read More: ധോണി വിരമിക്കലിന് ഒരുങ്ങുന്നുവോ ? കോഹ‍്‍ലിയുടെ ട്വീറ്റിൽ ആശങ്കയോടെ ആരാധക‍ർ!

ധോണിയോട് ഒപ്പമുള്ള ആ ചിത്രം പങ്ക് വെച്ചതിൻെറ രഹസ്യം വെളിപ്പെടുത്തിയിരിക്കുകയാണ് ഇപ്പോൾ കോഹ‍്‍ലി. "എൻെറ മനസ്സിൽ അപ്പോൾ പ്രത്യേകിച്ച് ഒന്നും തന്നെ ഇല്ലായിരുന്നു. വീട്ടിൽ വെറുതെ ഇരിക്കവേ ഈ ചിത്രം പോസ്റ്റ് ചെയ്യാൻ തോന്നി. അത് പിന്നീടം വാർത്തയായി. അത് എനിക്ക് ഇപ്പോൾ വലിയ പാഠമായിരിക്കുകയാണ്," ദക്ഷിണാഫ്രിക്കക്കെതിരായ ടി20 മത്സരത്തിന് മുമ്പ് നടത്തിയ വാർത്താസമ്മേളനത്തിൽ കോഹ‍്‍ലി പറഞ്ഞു.

Read More: പന്തിന് എന്താണ് സംഭവിക്കുന്നത്? ഇക്കാര്യം പരിഹരിച്ചേ പറ്റൂ; ക്ലൂസ‍്‍നറുടെ ഉപദേശം

"നമ്മൾ ഒരു കാര്യം ചിന്തിക്കുന്നത് പോലെ ആവണമെന്നില്ല, ലോകം മുഴുവൻ ചിന്തിക്കുന്നത്. ആ മത്സരം വളരെ സ്പെഷ്യലായിരുന്നു. അതിനെ കുറിച്ച് ഞാൻ നേരത്തെ ഒന്നും കാര്യമായി പറഞ്ഞിരുന്നില്ല. അത് കൊണ്ടാണ് ആ ചിത്രം പോസ്റ്റ് ചെയ്തത്," കോഹ‍്‍ലി പറഞ്ഞു.