ടി20 ലോകകപ്പിന് ശേഷം ക്യാപ്റ്റൻ സ്ഥാനം രാജിവെക്കും; വമ്പൻ പ്രഖ്യാപനവുമായി കോലി

ടി20 ക്രിക്കറ്റിൽ ക്യാപ്റ്റൻ സ്ഥാനം ഒഴിയുമെന്ന് ഇന്ത്യൻ നായകൻ വിരാട് കോലി. ലോകകപ്പിന് ശേഷം താൻ സ്ഥാനമൊഴിയുമെന്ന് വ്യാഴാഴ്ച ട്വിറ്ററിലാണ് താരം പ്രഖ്യാപിച്ചിരിക്കുന്നത്. ഏകദിനത്തിലും ടെസ്റ്റിലും മാത്രമായി ക്യാപ്റ്റൻസിയിൽ തുടരാനാണ് താരത്തിൻെറ തീരുമാനം. "ഒക്ടോബറിൽ ദുബായിൽ നടക്കുന്ന ടി20 ലോകകപ്പിന് ശേഷം ഞാൻ ടി20 ക്യാപ്റ്റൻസി ഒഴിയുകയാണ്," കോലി ട്വിറ്ററിൽ കുറിച്ചു.


വളരെയേറെ ചർച്ചകൾക്കും ആലോചനകൾക്കും ശേഷമാണ് ഈ തീരുമാനമെടുത്തത്. കോച്ച് രവി ശാസ്ത്രിയോടും ഉപനായകൻ രോഹിത് ശർമയോടും ഇതുമായി ബന്ധപ്പെട്ട് ചർച്ച നടത്തിയിട്ടുണ്ട്. ബിസിസിഐ സെക്രട്ടറി ജെയ് ഷായെയും പ്രസിഡൻറ് സൌരവ് ഗാംഗുലിയെയും തീരുമാനം അറിയിച്ചിട്ടുണ്ടെന്നും കോലി പറഞ്ഞു.

ടി20 ലോകകപ്പിന് ശേഷം കോച്ചും ക്യാപ്റ്റനും മാറുന്നു; ഇന്ത്യൻ ക്രിക്കറ്റ് അടിമുടി മാറും!

മൂന്ന് ഫോർമാറ്റിലും ക്യാപ്റ്റനായി തുടരുമ്പോൾ ജോലിഭാരം കാര്യമായി കൂടുന്നുണ്ട്. കഴിഞ്ഞ 8-9 വർഷങ്ങളായി തിരക്കിട്ട കരിയറിലൂടെയാണ് കടന്ന് പോവുന്നത്. 5 വർഷത്തിലധികമായി മൂന്ന് ഫോർമാറ്റിലും ടീമിനെ നയിക്കുന്നുണ്ട്. ടെസ്റ്റിലും ഏകദിനത്തിലും ക്യാപ്റ്റൻസിയിൽ കൂടുതൽ ശ്രദ്ധ കേന്ദീകരിക്കാനാണ് തീരുമാനമെന്നും കോലി വ്യക്തമാക്കി.

ഉപനായകൻ രോഹിത് ശർമ തന്നെയായിരിക്കും ഇനി ടി20 ക്രിക്കറ്റിൽ കോലിയുടെ പിൻഗാമിയാവുക. 2019ലെ ഏകദിന ലോകകപ്പിന് ശേഷം തന്നെ സ്പ്ലിറ്റ് ക്യാപ്റ്റൻസിയുമായി ബന്ധപ്പെട്ട് ഇന്ത്യൻ ക്രിക്കറ്റിൽ ചർച്ചകൾ നടന്നിരുന്നു. ഐപിഎല്ലിൽ മുംബൈ ഇന്ത്യൻസിനെ 5 തവണ കിരീടനേട്ടത്തിലേക്ക് നയിച്ചിട്ടുള്ള ക്യാപ്റ്റനാണ് രോഹിത്. കോലി നയിക്കുന്ന ആർസിബി ഇത് വരെ ഒരു തവണ പോലും കപ്പ് നേടിയിട്ടില്ല.

എംഎസ് ധോണിക്ക് ശേഷം ഇന്ത്യ ഇത് വരെ ഒരു ഐസിസി കിരീടവും നേടിയിട്ടില്ല. ടി20 ലോകകപ്പ് കോലിക്ക് മുന്നിൽ വലിയ വെല്ലുവിളിയാണ്. പരിശീലകൻ രവി ശാസ്ത്രിയും ടി20 ലോകകപ്പിന് ശേഷം സ്ഥാനമൊഴിയാൻ ഇരിക്കുകയാണ്.

ഓസ്ട്രേലിയക്കെതിരായ ഇന്ത്യയുടെ ടെസ്റ്റ് പരമ്പര വിജയിച്ചതോടെയാണ് കോലി തിരക്കുകൾ അൽപം ഒഴിവാക്കാൻ ആലോചിച്ച് തുടങ്ങിയത്. കോലിക്കും ഭാര്യ അനുഷ്ക ശർമക്കും കുഞ്ഞ് പിറന്നതും ഇതേ സമയത്തായിരുന്നു. ക്യാപ്റ്റൻ സ്ഥാനം ഒഴിയുന്നതുമായി ബന്ധപ്പെട്ട് കോലി ടീം മാനേജ്മെൻറുമായും രോഹിത് ശർമയുമായും സംസാരിച്ചതായും നേരത്തെ തന്നെ റിപ്പോർട്ടുകൾ പുറത്ത് വന്നിരുന്നു.

ബാറ്റിങിൽ കൂടുതൽ ശ്രദ്ധ കേന്ദ്രീകരിക്കാൻ കൂടി വേണ്ടിയാണ് കോലി ക്യാപ്റ്റൻ സ്ഥാനം ഒഴിയാൻ തീരുമാനിച്ചത്. കഴിഞ്ഞ കുറച്ച് കാലമായി താരം ബാറ്റിങിൽ മോശം ഫോമിലാണ്. നിലവിൽ ഇംഗ്ലണ്ട് പര്യടനത്തിലും തിളങ്ങിയിരുന്നില്ല. ലോകക്രിക്കറ്റിൽ 2022ൽ വീണ്ടും ഒരു ടി20 ലോകകപ്പും പിന്നീട് 2023ൽ ഒരു ഏകദിന ലോകകപ്പും വരാനുണ്ട്. നിലവിലെ ഏകദിന ലോകകപ്പിലും കോലി തന്നെയായിരിക്കും ഇന്ത്യയെ നയിക്കുക. 2019ൽ കോലിയുടെ നേതൃത്വത്തിൽ ഇന്ത്യ സെമിയിൽ പരാജയപ്പെട്ടിരുന്നു. ലോക ടെസ്റ്റ് ചാമ്പ്യൻഷിപ്പിൽ ഫൈനലിൽ ഇന്ത്യ തോൽക്കുകയാണ് ചെയ്തത്. ഇത് വരെ 49 മത്സരങ്ങളിൽ കോലി ഇന്ത്യയെ നയിച്ചപ്പോൾ 29 മത്സരങ്ങളിൽ ടീം വിജയിച്ചിട്ടുണ്ട്.