ഇന്ത്യൻ ക്രിക്കറ്റിന് മറ്റൊരു സന്തോഷവാർത്ത; വിരാടിനും അനുഷ്കയ്ക്കും കുഞ്ഞ് പിറന്നു!

സിഡ്നി ടെസ്റ്റിലെ ഐതിഹാസിക സമനിലയ്ക്ക് പിന്നാലെ ഇന്ത്യൻ ക്രിക്കറ്റ് ടീമിന് മറ്റൊരു സന്തോഷവാർത്ത കൂടി. നായകൻ വിരാട് കോലിക്കും ഭാര്യ അനുഷ്ക ശർമയ്ക്കും കുഞ്ഞ് പിറന്നു. പെൺകുഞ്ഞ് പിറന്നെന്ന വാർത്ത വിരാട് കോലി തന്നെയാണ് ട്വിറ്ററിൽ പങ്കുവെച്ചിരിക്കുന്നത്. ഓസ്ട്രേലിയൻ പര്യടനത്തിലെ ഒന്നാം ടെസ്റ്റിന് ശേഷം കോലി നാട്ടിലേക്ക് മടങ്ങിയിരുന്നു. ഭാര്യയുടെ പ്രസവസമയത്ത് ബിസിസിഐയുടെ അനുമതിയോടെയാണ് ഇന്ത്യൻ നായകൻ ക്രിക്കറ്റിൽ നിന്ന് അവധിയെടുത്തിരുന്നത്.
2017 ഡിസംബർ 11ന് ഇറ്റലിയിൽ വെച്ചായിരുന്നു കോലിയുടെയും അനുഷ്കയുടെയും വിവാഹം. ഒരു പരസ്യചിത്രത്തിൽ അഭിനയിക്കുമ്പോഴാണ് ഇരുവരും അടുത്ത് പരിചയപ്പെടുന്നത്. പിന്നീട് പ്രണയത്തിലാവുകയും വിവാഹിതരാവുകയും ചെയ്തു. കഴിഞ്ഞ വർഷം ആഗസ്തിലാണ് അനുഷ്ക ഗർഭിണിയാണെന്ന വാർത്ത ഇരുവരും പങ്കുവെച്ചത്.

Also Read: റിഷഭ് പന്തിനോട് സ്റ്റീവ് സ്മിത്ത് കാണിച്ചത് ചതി? വീഡിയോ പുറത്ത്, സിഡ്നി ടെസ്റ്റിൽ വൻവിവാദം!!

"ഞങ്ങൾക്ക് പെൺകുഞ്ഞ് പിറന്നെന്ന വിവരം ഏറെ സന്തോഷത്തോടെ നിങ്ങളെ അറിയിക്കുകയാണ്. നിങ്ങളുടെ പ്രാർഥനകൾക്കും ആശംസകൾക്കും നന്ദി. അനുഷ്കയും കുഞ്ഞും ആരോഗ്യത്തോടെ ഇരിക്കുന്നു. ഏറെ സന്തോഷകരമായ ജീവിതത്തിലെ മറ്റൊരു അധ്യായത്തിന് തുടക്കമാവുകയാണ്" കോലി ട്വീറ്റ് ചെയ്തു.


ക്രിക്കറ്റ് ലോകത്ത് ആരാധകർക്ക് ഏറെ സ്നേഹമുള്ള സെലബ്രിറ്റി ദമ്പതിമാരാണ് കോലിയും അനുഷ്കയും. ആരാധകർ സ്നേഹത്തോടെ ഇരുവരുെയും 'വിരുഷ്ക' എന്നാണ് വിളിക്കുന്നത്. 2020 ആഗസ്തിൽ അനുഷ്കയാണ് ഗർഭിണിയാണെന്ന വാർത്ത ഇൻസ്റ്റഗ്രാമിലൂടെ പങ്കുവെച്ചത്.