ഏകദിന റാങ്കിങിലും ബുംറയ്ക്ക് തിരിച്ചടി; ബാറ്റ്സ്മാൻമാരിൽ ഒന്നാം സ്ഥാനം നിലനിർത്തി കോലി

ഇന്ത്യയും ന്യൂസിലൻറും തമ്മിലുള്ള ഏകദിന പരമ്പരയ്ക്ക് ശേഷം ഏറ്റവും പുതിയ ഐസിസി റാങ്കിങ് പ്രഖ്യാപിച്ചു. പരമ്പരയിൽ മോശം പ്രകടനമാണ് കാഴ്ച വെച്ചതെങ്കിലും ഇന്ത്യൻ നായകൻ വിരാട് കോലി ബാറ്റ്സ്മാൻമാരിൽ ഒന്നാം സ്ഥാനം നിലനിർത്തി. മൂന്ന് മത്സരങ്ങളും കളിച്ച കോലി ആകെ നേടിയത് 75 റൺസാണ്.
പരമ്പരയിൽ കളിക്കാതിരുന്ന ഇന്ത്യൻ ഉപനായകൻ രോഹിത് ശർമ തന്നെയാണ് രണ്ടാം സ്ഥാനത്ത്.

ബൗളർമാരുടെ റാങ്കിങിൽ ഇന്ത്യൻ പേസർ ജസ്പ്രീത് ബുംറക്ക് ഒന്നാം സ്ഥാനം നഷ്ടമായി. രണ്ടാം സ്ഥാനത്തുണ്ടായിരുന്ന ന്യൂസിലൻറ് പേസർ ട്രെൻറ് ബോൾട്ടാണ് ഒന്നാമതെത്തിയത്. ബോൾട്ടും പരമ്പരയിൽ കളിച്ചിരുന്നില്ല. അഫ്ഗാനിസ്ഥാൻെറ മുജീബുർ റഹ്മാൻ, ദക്ഷിണാഫ്രിക്കയുടെ കഗിസോ റബാദ, പാറ്റ് കമ്മിൻസ് എന്നിവരാണ് റാങ്കിങിൽ 3,4,5 സ്ഥാനങ്ങളിലുള്ളത്.

Also Read: കിവീസിനെതിരായ പരമ്പര; ഇന്ത്യ തോറ്റതിന് പിന്നിൽ ഈ 3 കാരണങ്ങൾ നിർണായകം, പരിഹരിച്ചില്ലെങ്കിൽ കോലിക്ക് പണിയാവും!!

ഓൾ റൗണ്ടർമാരുടെ പട്ടികയിൽ ഇന്ത്യയുടെ രവീന്ദ്ര ജഡേജ മൂന്ന് സ്ഥാനങ്ങൾ മുന്നോട്ട് കയറി ഏഴാം റാങ്കിലെത്തി. രണ്ട് മത്സരങ്ങളിൽ ബാറ്റ് ചെയ്ത ജഡേജ 64 റൺസും രണ്ട് വിക്കറ്റുകളും വീഴ്ത്തി. ഇംഗ്ലണ്ടിൻെറ ബെൻ സ്റ്റോക്സിനെ മറികടന്ന് അഫ്ഗാനിസ്ഥാൻെറ മുഹമ്മദ് നബി ഒന്നാമതെത്തി.

Also Read: വിരാട് കോലിക്ക് എന്താണ് സംഭവിച്ചത് ? ഇത് പോലൊരു നാണക്കേട് റെക്കോർഡ് ക്യാപ്റ്റനായ ശേഷം സംഭവിച്ചിട്ടില്ല!!