ഇന്ത്യൻ പേസർ നവദീപ് സെയ്നിക്കെതിരെ ഐസിസിയുടെ അച്ചടക്ക നടപടി

ന്യൂഡൽഹി: വെസ്റ്റ് ഇൻഡീസിനെതിരായ ഒന്നാം ട്വൻറി20യിൽ മിന്നുന്ന പ്രകടനം കാഴ്ച വെച്ച നവദീപ് സെയ്നിക്കെതിരെ ഐസിസിയുടെ അച്ചടക്ക നടപടി. അരങ്ങേറ്റ മത്സരത്തിൽ നാലോവറിൽ 17 റൺസ് വഴങ്ങി സെയ്നി മൂന്ന് വിക്കറ്റുകൾ വീഴ്ത്തിയിരുന്നു. മത്സരത്തിലെ മാൻ ഓഫ് ദി മാച്ച് പുരസ്കാരവും അദ്ദേഹത്തിനായിരുന്നു.

മറ്റൊരു റെക്കോർഡും സെയ്നി മത്സരത്തിൽ സ്വന്തമാക്കിയിരുന്നു. ഒരു ടി20 മത്സരത്തിൻെറ അവസാന ഓവർ മെയ്ഡൻ എറിയുന്ന ആദ്യ ഇന്ത്യൻ ബോളറാണ് സെയ്നി. എന്നാൽ എല്ലാത്തിനും ഒടുവിൽ താരത്തിന് ഐസിസിയുടെ താക്കീത് ലഭിച്ചിരിക്കുകയാണ്. ആദ്യ ട്വൻറി20യിൽ വിൻഡീസ് താരം നിക്കോളാസ് പൂരൻെറ വിക്കറ്റ് വീഴ്ത്തിയപ്പോൾ അമിത ആഹ്ലാദം പ്രകടിപ്പിച്ചതാണ് സെയ്നിക്ക് വിനയായത്.

Read More: ഇനിയും അവസരം നൽകരുത്, യുവതാരം ഇന്ത്യൻ ടീമിൽ വേണ്ടെന്ന് ട്വിറ്ററിൽ ആരാധക‍ർ

വിൻഡീസ് താരത്തിനെ പ്രകോപിപ്പിക്കുന്ന തരത്തിലായിരുന്നു സെയ്നി ആംഗ്യം കാണിച്ചതെന്ന് ഐസിസി കണ്ടെത്തി. ഐസിസി പെരുമാറ്റച്ചട്ടം ആർട്ടിക്കിൾ 25ൻെറ ലംഘനമാണ് സെയ്നി നടത്തിയത്. താരത്തിന് ഇതോടെ ഒരു ഡീമെരിറ്റ് പോയിൻറ് ലഭിക്കും. മാച്ച് റഫറി ജെഫ് ക്രോയാണ് നടപടി എടുത്തത്. സെയ്നി കുറ്റം സമ്മതിച്ചിട്ടുണ്ട്.

വെസ്റ്റ് ഇൻഡീസിനെതിരായ ആദ്യ മത്സരത്തിൻെറ അഞ്ചാം ഓവറിലായിരുന്നു സംഭവം. ജസ്പ്രീത് ബുംറയെ പോലെ ഭാവിയുള്ള ഒരു ഡെത്ത് ഓവർ സ്പെഷ്യലിസ്റ്റിനെയാണ് ടീം ഇന്ത്യ സെയ്നിയിൽ പ്രതീക്ഷിക്കുന്നത്. അരങ്ങേറ്റ മത്സരത്തിൽ താരം ഏറെ പ്രതീക്ഷ നൽകുന്ന പ്രകടനമാണ് ഇന്ത്യക്കായി കാഴ്ച വെച്ചത്.

Read More: ബുംറക്ക് പോലും സാധിച്ചിട്ടില്ല; അരങ്ങേറ്റ മത്സരത്തിൽ സെയ‍്‍നിക്ക് റെക്കോ‍ർഡ്