സഞ്‌ജുവിനെ എട്ട് കോടിക്ക് സ്വന്തമാക്കി രാജസ്ഥാൻ റോയൽസ്

ബെംഗലൂരു: ഐപിഎല്ലിന്‍റെ പതിനൊന്നാം എഡീഷനിലേക്കുള്ള താരലേലത്തിൽ മലയാളി താരം സഞ്‌ജു വി.സാംസണെ എട്ട് കോടിക്ക് രാജസ്ഥാൻ റോയൽസ് സ്വന്തമാക്കി. സ‍ഞ്‍ജുവിന്‍റെ അടിസ്ഥാന വില ഒരു കോടിയായിരുന്നു. ഇത്രയും തുക പ്രതീക്ഷിച്ചിരുന്നില്ലെന്നും രാജസ്ഥാനിലേക്ക് പോകുന്നത് സ്വന്തം തറവാട്ടിലേക്ക് പോകുന്നത് പോലെയാണെന്നും സഞ്‌ജു പ്രതികരിച്ചു. എന്നാൽ പരിശീലനം ദ്രാവിഡിന്‍റെ കീഴിലല്ലാത്തത് ദുഃഖകരമാണെന്നും സഞ്‌ജു പറഞ്ഞു.

ഇംഗ്ലണ്ട് താരം ബെൻ സ്റ്റോക്സാണ് ഇതുവരെയുള്ളതിലെ വിലയേറിയ താരം. 12.5 കോടി രൂപയ്ക്ക് രാജസ്ഥാൻ റോയൽസ് സ്റ്റോക്സിനെ സ്വന്തമാക്കി. കെ.എൽ.രാഹുലിനെ കിങ്‌സ് ഇലവൻ പഞ്ചാബ് 11 കോടിക്ക് സ്വന്തമാക്കി.കരുൺ നായരെ 5.6 കോടിക്ക് കിങ്‌സ് ഇലവൻ പഞ്ചാബും സ്വന്തമാക്കി. ഓസ്ട്രേലിയൻ‌ പേസ് ബോളർ മിച്ചൽ സ്റ്റാർക്കിനെ 9.4 കോടി രൂപയ്ക്ക് കൊൽക്കത്ത നൈറ്റ് റൈഡേഴ്സും സ്വന്തമാക്കി.അതേ സമയം, സൺറൈസേഴ്‌സ് ഹൈദരാബാദ് ശിഖർ ധവാനെ 5.20 കോടി രൂപക്ക് നിലനിർത്തി. റൈറ്റ് ടൂ മാച്ച് കാർഡ് വഴിയാണ് ധവാനെ നിലനിർത്തിയത്. കിങ്‌സ് ഇലവൻ പഞ്ചാബ് ആർ.അശ്വിനെ 7.60 കോടിക്ക് സ്വന്തമാക്കി. കിറോൺ പൊള്ളാർഡിനെ 5.40 കോടിക്ക് മുംബൈ ഇന്ത്യൻസ് നിലനിർത്തി. എന്നാൽ, ക്രിസ് ഗെയിലിനെ ഇത് വരെ ഒരു ടീമും സ്വന്തമാക്കിയിട്ടില്ല.

ഗെയിലിനായി നാളെ വീണ്ടും ലേലം നടത്തും. ഗെയിലിന്‍റെ അടിസ്ഥാന വിലയായ രണ്ട് കോടി മുടക്കാൻ ഒരു ടീമും ധൈര്യപ്പെട്ടില്ല. ഗെയിലിന്‍റെ ശാരീരീരിക ക്ഷമതയില്ലായ്‌മയാണ് ടീം ഉടമകളെ ആശങ്കയിലാഴ്ത്തുന്നതെന്നാണ് സൂചന. യുവരാജ് സിങിനെ പഞ്ചാബ് റോയൽസ് അടിസ്ഥാന വിലയായ രണ്ട് കോടിക്ക് സ്വന്തമാക്കി. 6.4 കോടിക്ക് ഡൈ്വന്‍ ബ്രാവോയെ ചെന്നൈ സ്വന്തമാക്കി. 2.8 കോടിക്ക് ഗൗതം ഗംഭീർ ഡൽഹി ടീമിലേക്ക് ചേക്കേറി. നാലു കോടിക്ക് രഹാനെ രാജസ്ഥാൻ റോയൽസിലേക്ക് വരും.