James Anderson: ടെസ്റ്റില്‍ കൂടുതല്‍ വിക്കറ്റ് വീഴ്ത്തിയ പേസര്‍ ഇനി ആന്‍ഡേഴ്സണ്‍

ലണ്ടന്‍: ടെസ്റ്റ് ക്രിക്കറ്റില്‍ ഏറ്റവും കൂടുതല്‍ വിക്കറ്റ് നേടുന്ന പേസ് ബൗളറെന്ന റെക്കോര്‍ഡ് സ്വന്തം പേരില്‍ കുറിച്ച് ഇംഗ്ലണ്ട് താരം ജെയിംസ് ആന്‍ഡേഴ്സണ്‍. ഇന്ത്യയ്ക്കെതിരായ അഞ്ചാം ടെസ്റ്റിലാണ് താരം ചരിത്രം തിരുത്തിക്കുറിച്ചത്. 143 ടെസ്റ്റുകളില്‍ നിന്ന് 564 വിക്കറ്റുകള്‍ സ്വന്തമാക്കിയാണ് ആന്‍ഡേഴ്സന്‍റെ ചരിത്രനേട്ടം.

ഇന്ത്യയ്ക്കെതിരെ നടന്ന അവസാന മത്സരത്തില്‍ മുഹമ്മദ് ഷമിയുടെ വിക്കറ്റ് വീഴ്ത്തിയതോടെയാണ് ആന്‍ഡേഴ്സണ്‍ ചരിത്രത്തിന്‍റെ ഭാഗമായത്. ഓസ്ട്രേലിയന്‍ മുന്‍ ബൗളര്‍ ഗ്ലെന്‍ മഗ്രാത്തിനെ മറികടന്നാണ് ആന്‍ഡേഴ്സന്‍ നേട്ടം സ്വന്തമാക്കിയിരിക്കുന്നത്. 124 ടെസ്റ്റുകളില്‍ നിന്ന് 563 വിക്കറ്റുകളാണ് മഗ്രാത്ത് നേടിയിട്ടുള്ളത്.

അഞ്ച് ടെസ്റ്റുകളില്‍ നിന്നായി 24 വിക്കറ്റുകള്‍ സ്വന്തമാക്കിയ ആന്‍ഡേഴ്സണ്‍ തന്നെയാണ് പരമ്പരയിലെ വിക്കറ്റ് നേട്ടത്തിലും മുന്നില്‍ നില്‍ക്കുന്നത്. മുത്തയ്യ മുരളീധരന്‍, ഷെയ്ന്‍ വോണ്‍, അനില്‍ കുംബ്ലെ എന്നീ മൂന്ന് പേര്‍ മാത്രമാണ് വിക്കറ്റുകളുടെ എണ്ണത്തില്‍ ഇനി ആന്‍ഡേഴ്സണ് മുന്നിലുള്ളത്.