രണ്ടേ രണ്ട് വിക്കറ്റ് മതി; ട്വൻറി20 ക്രിക്കറ്റിൽ ചരിത്രനേട്ടത്തിനരികെ ബുംറ

ബെംഗലൂരു: ഓസ്ട്രേലിയക്കെതിരായ രണ്ടാം ട്വൻറി20 മത്സരത്തിൽ ഇന്ത്യൻ പേസർ ജസപ്രീത് ബുംറ ചരിത്രനേട്ടത്തിനരികെ. രണ്ട് വിക്കറ്റ് വീഴ്ത്താനായാൽ ഇന്ത്യക്കായി ട്വൻറി20യിൽ ഏറ്റവും കൂടുതൽ വിക്കറ്റുകൾ വീഴ്ത്തുന്ന താരമായി ബുംറ മാറും. ഇത് വരെ 51 വിക്കറ്റുകളാണ് ബുംറ ട്വൻറി20യിൽ വീഴ്ത്തിയിട്ടുള്ളത്.

52 വിക്കറ്റുകൾ നേടിയിട്ടുള്ള ഓഫ് സ്പിന്നർ ആർ.അശ്വിനാണ് ടി20യിൽ ഇന്ത്യക്കായി ഏറ്റവും കൂടുതൽ വിക്കറ്റുകൾ നേടിയിട്ടുള്ളത്. ഓസീസിനെതിരായ ആദ്യ ട്വൻറി20യിൽ മൂന്ന് വിക്കറ്റുകളാണ് ബുംറ പിഴുതത്. വെറും 16 റൺസ് വഴങ്ങിയായിരുന്നു അദ്ദേഹത്തിൻെറ പ്രകടനം.

ടി20യിൽ 50 വിക്കറ്റ് തികയ്ക്കുന്ന രണ്ടാമത്തെ ഇന്ത്യൻ ബോളറായി ബുംറ മാറി. അശ്വിൻ മാത്രമാണ് ബുംറയ്ക്ക് പുറമെ 50 വിക്കറ്റുകൾ വീഴ്ത്തിയിട്ടുള്ള മറ്റൊരു ബോളർ.

മത്സരത്തിലെ തൻെറ അവസാന ഓവറിലാണ് ബുംറ 50 വിക്കറ്റ് നേട്ടം കൈവരിച്ചത്. ഓസീസ് താരം പീറ്റർ ഹാൻസ്കോമ്പാണ് ബുംറയുടെ 50ാമത് ഇര. ഓസീസ് നായകൻ ആരോൺ ഫിഞ്ചിൻെറയും വിക്കറ്റ് ബുംറ വീഴ്ത്തിയിരുന്നു.