ദക്ഷിണാഫ്രിക്കയിൽ റബാദയുടെ മുന്നിൽ രോഹിത് പതറുന്നു

ജോഹന്നാസ് ബെർഗ്: ഇന്ത്യൻ മണ്ണിൽ ശ്രീലങ്കക്കെതിരെ മികച്ച പ്രകടനം നടത്തിയ ശേഷമാണ് രോഹിത് ശർമ്മ ദക്ഷിണാഫ്രിക്കൻ പര്യടനത്തിന് ഇറങ്ങുന്നത്. ടെസ്റ്റിൽ രഹാനെയെ പോലും മാറ്റി നിർത്തി രോഹിത് ടീമിൽ ഇടം പിടിച്ചു. ആദ്യ രണ്ട് ടെസ്റ്റുകളിലും അദ്ദേഹം പരാജയമായപ്പോൾ മൂന്നാം ടെസ്റ്റിൽ ടീമിൽ നിന്ന് മാറ്റി നിർത്തേണ്ടി വന്നു.

ഏകദിന പരമ്പരയിലെങ്കിലും രോഹിത് തിരിച്ച് വരുമെന്നായിരുന്നു പ്രതീക്ഷ. എന്നാൽ നാല് ഏകദിനങ്ങളിലും ഇന്ത്യൻ ഉപനായകൻ അമ്പേ പരാജയപ്പെട്ടു. കഗിസോ റബാദയെന്ന പേസ് ബൗളറാണ് രോഹിതിൻെറ വീഴ്ചയ്ക്ക് പിന്നിലെന്നാണ് കണക്കുകൾ പറയുന്നത്.

ദക്ഷിണാഫ്രിക്കൻ പര്യടനത്തിൽ ആകെ ആറ് തവണ രോഹിത് പുറത്തായത് റബാദക്ക് മുന്നിലാണ്. മൂന്ന് തവണ എൽ.ബി.ഡബ്ല്യു ആയാണ് പുറത്തായത്. മോശം ഫൂട്ട് വ‍ർക്കാണ് രോഹിതിന് വിനയാകുന്നത്. ഇത് കൃത്യമായി മുതലാക്കിയാണ് റബാദ കെണിയൊരുക്കുന്നത്. ഇന്ത്യൻ ഉപഭൂഖണ്ഡത്തിന് പുറത്ത് താരത്തിൻെറ മോശം പ്രകടനത്തിനെതിരെ വൻ വിമ‍ർശനമാണ് ഉയരുന്നത്.