സഞ്ജു വി സാംസണെതിരെ അന്വേഷണം ആരംഭിച്ചു

തിരുവനന്തപുരം: ക്രിക്കറ്റ് താരം സഞ്ജു വി സാംസണെതിരെ കേരള ക്രിക്കറ്റ് അസോസിയേഷന്‍ അന്വേഷണം ആരംഭിച്ചു. മത്സരത്തിനിടെ അനുമതിയില്ലാതെ ടീമില്‍ നിന്ന് വിട്ടു നിന്നുവെന്നാണ് ആരോപണം. സഞ്ജുവിന്റെ പിതാവ് കെസിഎ ഭാരവാഹികളെ അസഭ്യം പറഞ്ഞതായുള്ള പരാതിയും അന്വേഷണത്തിന്റെ പരിധിയില്‍പ്പെടും.

നാലംഗ സമിതിയെ അന്വേഷണത്തിന് നിയോഗിച്ചു. രണ്ടാഴ്ചയ്ക്കു മുന്‍പ് ബ്രബോണ്‍ സ്റ്റേഡിയത്തില്‍ ഗോവയ്ക്കെതിരായ മത്സരത്തിനിടെ സഞ്ജു ടീമില്‍ നിന്നും അനുമതിയില്ലാതെ വിട്ടുനിന്നുവെന്നും ടീമിന്റെ അച്ചടക്കങ്ങള്‍ക്ക് വിരുദ്ധമായി പ്രവര്‍ത്തിച്ചുവെന്നുമാണ് ആരോപണം. ഡ്രസ്സിംഗ് റൂമില്‍ നിന്നും അനുമതിയില്ലാതെ പുറത്തുപോയ സഞ്ജു അര്‍ധരാത്രിയോടെയാണ് ടീം താമസിച്ചിരുന്ന ഹോട്ടലില്‍ തിരിച്ചെത്തിയതെന്നും പരാതി ഉയര്‍ന്നിട്ടുണ്ട്. പരാതിയുടെ അടിസ്ഥാനത്തില്‍ സഞ്ജുവിനെതിരെ പ്രഖ്യാപിച്ച അന്വേഷണത്തോട് താരം ഇതുവരേയും പ്രതികരിച്ചിട്ടില്ല.