രണ്ടാം ടെസ്റ്റിൽ ധവാന് പകരം കെ.എൽ.രാഹുൽ കളിക്കും

ജൊഹന്നാസ് ബ‍ർഗ്: ദക്ഷിണാഫ്രിക്കക്കെതിരായ രണ്ടാം ടെസ്റ്റിൽ ഇന്ത്യൻ ബാറ്റിങ് ലൈനപ്പിൽ മാറ്റങ്ങളുണ്ടാവുമെന്ന് സൂചന. ഓപ്പണർ ശിഖർ ധവാന് പകരം കെ.എൽ.രാഹുൽ കളിച്ചേക്കും. എന്നാൽ അജിങ്ക്യ രഹാനെയെ ഉൾപ്പെടുത്തിയേക്കില്ല. രോഹിത് ശർമ്മയെ തന്നെ രണ്ടാം ടെസ്റ്റിലും കളിപ്പിക്കാനാണ് ടീമിൻെറ തീരുമാനം.

ഒന്നാം ടെസ്റ്റിൽ ഇന്ത്യൻ ബാറ്റിങ് നിര പരാജയപ്പെട്ടതിനെ തുടർന്ന് ടീം തെരഞ്ഞെടുപ്പിനെതിരെ നിരവധി പരാതികൾ ഉയർന്നിരുന്നു. രഹാനെയെയും കെ.എൽ.രാഹുലിനെയും ഉൾപ്പെടുത്താത്തതിനെതിരെ മുൻ താരങ്ങൾ വരെ രംഗത്ത് വന്നു. മുൻ മത്സരങ്ങളിലെ ഫോമാണ് രോഹിതിന് ടീമിൽ സ്ഥാനമുറപ്പിച്ചത്. രഹാനെ ശ്രീലങ്കൻ പര്യടനത്തിൽ വൻ പരാജയമായിരുന്നു.

വിദേശത്ത് മികച്ച റെക്കോർഡുള്ള താരമാണെങ്കിലും ഫോമില്ലായ്മയാണ് രഹാനെയെ കളിപ്പിക്കാതിരിക്കാൻ കാരണം. രണ്ടാം ടെസ്റ്റിലും രോഹിത് കളിക്കുമെന്ന് തന്നെയാണ് റിപ്പോർട്ട്.