വിരാട് രോഹിതിന് വഴി മാറണോ; ഇതാണ് നെഹ‍്‍റയുടെ ഉത്തരം

ന്യൂഡൽഹി: രോഹിത് ശർമ്മയുടെ ക്യാപ്റ്റൻസിയിൽ വെസ്റ്റ് ഇൻഡീസിനെതിരായ ഏകദിന പരമ്പര സ്വന്തമാക്കിയിരിക്കുകയാണ് ഇന്ത്യ. ഈ അടുത്ത് നടന്ന ഏഷ്യാകപ്പിലും രോഹിത് നയിച്ച ടീം ഇന്ത്യ കിരീടം നേടിയിരുന്നു. ക്യാപ്റ്റനാവുമ്പോൾ രോഹിത് ബാറ്റിങിലും മിന്നുന്ന ഫോമിലാണ്.

തിരക്കേറിയ ക്രിക്കറ്റ് ഷെഡ്യൂളിനിടയിൽ ട്വൻറി20യിൽ വിരാട് കോഹ‍്‍ലി രോഹിതിന് നായകസ്ഥാനം കൈമാറണമെന്ന് ചിലയിടങ്ങളിൽ നിന്ന് ആവശ്യമുയരുന്നുണ്ട്. ഇക്കാര്യത്തിൽ പ്രതികരണവുമായി എത്തിയിരിക്കുകയാണ് മുൻ ഇന്ത്യൻ പേസർ ആശിഷ് നെഹ്റ.

"ധൃതി പിടിച്ച് രോഹിതിന് ഉത്തരവാദിത്വം നൽകണമെന്ന് തോന്നുന്നില്ല. തീർച്ചയായും അദ്ദേഹം മികച്ച ക്യാപ്റ്റൻ തന്നെയാണ്. മുംബൈ ഇന്ത്യൻസിനെ എെപിഎല്ലിൽ നയിക്കുന്ന കാര്യത്തിലും അത് രോഹിത് തെളിയിച്ചിട്ടുണ്ട്. എന്നാൽ ഇപ്പോൾ വിരാടിൽ നിന്ന് ഉത്തരവാദിത്വം മാറ്റേണ്ട സാഹചര്യം ഇല്ലെന്നാണ് എൻെറ അഭിപ്രായം," ക്രിക്കറ്റ് നെക്സ്റ്റിനോട് സംസാരിക്കവേ നെഹ്റ പറഞ്ഞു.

ഇന്ത്യൻ ക്രിക്കറ്റ് ടീമിനെ എല്ലാ മേഖലകളിലും ഒത്തിണക്കത്തോടെ നയിക്കുന്ന ക്യാപ്റ്റനാണ് വിരാട്. അദ്ദേഹം തന്നെയാണ് ഇക്കാര്യത്തിൽ ഇപ്പോൾ മികച്ച ചോയ്സ്. എന്നാൽ ഇക്കാര്യത്തിൽ അന്തിമ തീരുമാനം എടുക്കേണ്ടത് സെലക്ടർമാർ ആണെന്നും നെഹ്റ കൂട്ടിച്ചേർത്തു.