സച്ചിന്‍ ബേബിക്കെതിരെ സഹതാരങ്ങള്‍ നല്‍കിയ പരാതി കെ.സി.എ തള്ളി

തിരുവനന്തപുരം: കേരള രഞ്ജി ടീം ക്യാപ്റ്റന്‍ സച്ചിന്‍ ബേബിക്കെതിരായ സഹതാരങ്ങളുടെ പരാതി കേരള ക്രിക്കറ്റ് അസോസിയേഷന്‍ തള്ളി. കെസിഎ നടത്തിയ പ്രാഥമിക അന്വേഷണത്തില്‍ ആരോപണങ്ങളില്‍ കഴമ്പില്ലെന്ന് കണ്ടെത്തിയതിനെ തുടര്‍ന്നാണ് പരാതി തള്ളിയത്.

അതേസമയം സച്ചിന്‍ ബേബിക്കെതിരെ മുതിര്‍ന്ന താരങ്ങള്‍ ഗൂഢാലോചന നടത്തിയതായി കെസിഎ കണ്ടെത്തി. ഇതിന്‍റെ അടിസ്ഥാനത്തില്‍ സഞ്ജു വി സാംസണ്‍ അടക്കമുള്ള മുതിര്‍ന്ന താരങ്ങളോട് കേരള ക്രിക്കറ്റ് അസോസിയേഷന്‍ വിശദികരണം തേടി. ഏഴുദിവസത്തിനകം വിശദീകരണം നല്‍കാനാണ് നിര്‍ദ്ദേശം.

ടീമിലെ സഹകളിക്കാരോട് സച്ചിന്‍ ബേബി വളരെ മോശമായാണ് പെരുമാറുന്നതെന്നായിരുന്നു പരാതിയിലെ പ്രധാന ആരോപണം. കളി ജയിക്കുമ്പോള്‍ ക്രെഡിറ്റ് എടുക്കുകയും തോല്‍ക്കുമ്പോള്‍ സഹകളിക്കാരുടെ മേല്‍ പഴി ചാരുകയും ചെയ്യുകയാണ് താരത്തിന്‍റെ പതിവെന്നും സഹകളിക്കാര്‍ ആരോപിക്കുന്നു. സഞ്ജു വി സാംസണ്‍ അടക്കം ടീമിലെ 13 താരങ്ങളാണ് പരാതിയുമായി രംഗത്തെത്തിയത്.