ലോർഡ‍്‍സ് ടെസ്റ്റ്: പൂജാരയെ കളിപ്പിക്കണമെന്ന് മുൻതാരങ്ങൾ

ലണ്ടൻ: ഇംഗ്ലണ്ടിനെതിരായ രണ്ടാം ടെസ്റ്റിൽ ചേതേശ്വർ പൂജാരയെ ടീമിൽ ഉൾപ്പെടുത്തണമെന്ന ആവശ്യം ഉയരുന്നു. ഒന്നാം ടെസ്റ്റിൽ വളരെ അപ്രതീക്ഷിതമായാണ് പൂജാരയെ ഉൾപ്പെടുത്താതിരുന്നത്. പൂജാരക്ക് പകരം ധവാനെ ഓപ്പണറായി ഇറക്കാനായിരുന്നു കോഹ‍്‍ലിയുടെ തീരുമാനം.

എന്നാൽ ധവാന് പ്രതീക്ഷിച്ച രീതിയിൽ താളം കണ്ടെത്താനായില്ല. വിരാട് കോഹ‍്‍ലി മാത്രമാണ് ഇന്ത്യൻ നിരയിൽ തിളങ്ങിയ ഏക ബാറ്റ്സ്മാൻ. കെ.എൽ.രാഹുൽ, മുരളി വിജയ്, അജിങ്ക്യ രഹാനെ തുടങ്ങിയ താരങ്ങളൊക്കെയും പരാജയമായിരുന്നു. ടെസ്റ്റ് സ്പെഷ്യലിസ്റ്റ് ബാറ്റ്സ്മാൻ ആയ പൂജാരയെ ഉൾപ്പെടുത്താതിന് ക്യാപ്റ്റൻ കോഹ‍്‍ലി ഏറെ വിമർശനങ്ങൾ ഏറ്റുവാങ്ങി.

മൊഹീന്ദർ അമർനാഥ്, സുനിൽ ഗവാസ്കർ തുടങ്ങിയ മുൻതാരങ്ങൾ രണ്ടാം ടെസ്റ്റിൽ പൂജാരയെ ടീമിൽ ഉൾപ്പെടുത്തണമെന്ന് ആവശ്യപ്പെടുന്നു. ഇംഗ്ലണ്ടിൽ കളിച്ചുള്ള പൂജാരയുടെ പരിചയവും ടീമിന് മുതൽക്കൂട്ടാവും എന്നാണ് അവരുടെ അഭിപ്രായം.