ചരിത്രമെഴുതി മിഥാലി രാജ്; തകർപ്പൻ നേട്ടത്തിൽ സച്ചിനൊപ്പവുമെത്തി

വനിതാ ലോകപ്പിന്റെ 6 പതിപ്പുകളിൽ കളിക്കുന്ന ആദ്യ വനിതാ ക്രിക്കറ്ററായി ഇന്ത്യൻ ടീം ക്യാപ്റ്റൻ മിഥാലി രാജ്. ന്യൂസിലൻഡിൽ നടന്നു കൊണ്ടിരിക്കുന്ന 2022 എഡിഷൻ ഏകദിന ലോകകപ്പിൽ പാകിസ്ഥാനെതിരെ നടന്നു കൊണ്ടിരിക്കുന്ന തങ്ങളുടെ ആദ്യ മത്സരത്തിൽ കളിക്കാനിറങ്ങിയതോടെയാണ് മിഥാലി രാജ് ചരിത്ര നേട്ടത്തിലെത്തിയത്. 2000 ൽ തന്റെ ആദ്യ ഏകദിന ലോകകപ്പ് കളിച്ച മിഥാലി, പിന്നീട് 2005, 2009, 2013, 2017, 2022 എഡിഷനുകളിലും കളിച്ചാണ് റെക്കോർഡ് ബുക്കിലെത്തിയിരിക്കുന്നത്.

മുൻ ന്യൂസിലൻഡ് താരൻ ഡെബ്ബി ഹോക്ലി, ഇംഗ്ലണ്ട് താരം ഷാർലറ്റ് എഡ്വേഡ്സ് എന്നിവരെയാണ് ഇക്കാര്യത്തിൽ മിഥാലി പിന്നിലാക്കിയത്. ഇന്ത്യൻ ടീമിൽ മിഥാലിയുടെ സഹതാരമായ ജുലൻ ഗോസ്വാമി അഞ്ച് ലോകകപ്പുകളിൽ കളിച്ചിട്ടുണ്ട്.

ഡബിള്‍ സെഞ്ച്വറിക്ക് അടുത്തുവെച്ചുള്ള രോഹിത്തിന്റെ ഞെട്ടിക്കുന്ന ഡിക്ലറേഷനില്‍ പ്രതികരിച്ച് ജഡേജ
അതേ സമയം എറ്റവും കൂടുതൽ ലോകകപ്പുകൾ കളിച്ച ഇന്ത്യൻ ക്രിക്കറ്റർമാരിൽ ഇതിഹാസ താരം‌സച്ചിൻ ടെണ്ടുൽക്കറുടെ ഒപ്പമെത്താനും മിഥാലിക്ക് കഴിഞ്ഞു. 1992ൽ ലോകകപ്പിൽ അരങ്ങേറ്റം കുറിച്ച സച്ചിനും 6 ലോകകപ്പുകളിലാണ് ഇന്ത്യൻ ജേഴ്സിയണിഞ്ഞത്. 1992 ന് പുറമേ, 1996, 1999, 2003, 2007, 2011 വർഷങ്ങളിലായിരുന്നു അത്. ഇതിൽ 2011 ൽ ടീം ഇന്ത്യക്കൊപ്പം കിരീടം ചൂടാനും സച്ചിന് കഴിഞ്ഞു. സച്ചിനും മിഥാലിക്കും പുറമേ പാക് ഇതിഹാസം ജാവേദ് മിയാൻ ദാദാണ് 6 ഏകദിന ലോകകപ്പുകൾ കളിച്ച മറ്റൊരു താരം.

Also Read : ഒന്നുമല്ലാതിരുന്ന രാജസ്ഥാൻ ആദ്യ ഐപിഎല്ലിൽ കിരീടം ചൂടിയതെങ്ങനെ; അറിയണം ഷെയിൻ വോണിന്റെ ആ മാന്ത്രികതയെ...

അതേ സമയം മിഥാലി രാജ് ചരിത്ര നേട്ടത്തിലെത്തിയ മത്സരത്തിൽ ആദ്യം ബാറ്റ് ചെയ്ത ടീം ഇന്ത്യ നിശ്ചിത 50 ഓവറുകളിൽ 244/7 എന്ന പൊരുതാവുന്ന സ്കോർ നേടിയിട്ടുണ്ട്. ടോസ് നേടി ബാറ്റിംഗ് തിരഞ്ഞെടുത്ത മത്സരത്തിൽ സ്മൃതി മന്ദാന, സ്നേഹ് റാണ, പൂജ വസ്ത്രേകർ എന്നിവരുടെ അർധ സെഞ്ചുറികളാണ് ഇന്ത്യക്ക് കരുത്തായത്. 33.1 ഓവറുകളിൽ 114/6 എന്ന നിലയിൽ തകർന്നതിന് ശേഷമാണ് ടീം ഇന്ത്യ ഭേദപ്പെട്ട സ്കോറിലേക്ക് കുതിച്ചെത്തിയത്.