കരാറില്‍ നിന്ന് പുറത്താക്കി ബിസിസിഐ
ടീം ഇന്ത്യയുടെ സീനിയര്‍ ടീമിലെ താരങ്ങളുടെ വാര്‍ഷിക കരാറില്‍ നിന്നാണ് എംഎസ് ധോണിയെ ബിസിസിഐ പുറത്താക്കിയത്. കഴിഞ്ഞ ദിവസമാണ് കരാര്‍ പുതുക്കിക്കൊണ്ടുള്ള വിവരങ്ങള്‍ ബിസിസിഐ പുറത്ത് വിട്ടത്. ലിസ്റ്റില്‍ മുന്‍ ക്യാപ്റ്റന്‍ എംഎസ് ധോണിയുടെ പേര് കാണാതെ പോയതാണ് ആരാധകരെ ആശങ്കയിലാഴ്ത്തിയത്. എ പ്ലസ് ഗ്രേഡില്‍ വിരാട് കോലി, രോഹിത് ശര്‍മ, ജസ്പ്രീത് ബുംറ എന്നിവര്‍ മാത്രമാണുള്ളത്. എ ഗ്രേഡ് താരങ്ങളുടെ പട്ടികയിലും ധോണി ഉണ്ടായിരുന്നില്ല.
പുറത്താക്കലിന് പിന്നാലെ ധോണി ചെയ്തത്
വാര്‍ഷിക കരാറില്‍ നിന്ന് ബിസിസിഐ പുറത്താക്കിയ നടപടിയോട് ഒരു തരത്തിലും പ്രതികരിക്കാന്‍ എംഎസ് ധോണി തയ്യാറായിരുന്നില്ല. കഴിഞ്ഞ കുറച്ച് നിലനില്‍ക്കുന്ന ധോണിയുടെ വിരമിക്കല്‍ സംബന്ധിച്ച് ക്രിക്കറ്റ് ലോകത്ത് ഉയര്‍ന്ന് വരുന്ന ചര്‍ച്ചകള്‍ക്കും അഭ്യൂഹങ്ങള്‍ക്കും മറുപടി പറയാനും മുന്‍ നായകന്‍ തയ്യാറായിരുന്നില്ല. ഒന്നിനോടും പ്രതികരിക്കാതെ കുടുംബത്തോടും സൈന്യത്തോടുമൊപ്പം സമയം ചെലവഴിക്കുകയായിരുന്നു താരം. എന്നാല്‍ ബിസിസിഐയുടെ നടപടിക്ക് പിന്നാലെ സംഭവിച്ചത് മറ്റൊന്നായിരുന്നു.
പുറത്താക്കലിന് പിന്നാലെ പരിശീലനം
സെന്‍ട്രല്‍ കരാറില്‍ നിന്ന് ബിസിസിഐ പുറത്താക്കിയതിന് പിന്നാലെ ഇത്രയും നാള്‍ വിട്ടുനിന്ന ക്രിക്കറ്റ് മൈതാനത്തേക്ക് താരം ഓടിയെത്തുകയാണ് ആദ്യം ചെയ്തത്. ഝാര്‍ഖണ്ഡ് രഞ്ജി ടീമിനൊപ്പമാണ് ബിസിസിഐയുടെ പ്രഖ്യാപനത്തിന് പിന്നാലെ ധോണി പരിശീലനം നടത്തിയത്. വരുന്ന സീസണില്‍ ഝാര്‍ഖണ്ഡിനായി രഞ്ജി ട്രോഫിയില്‍ ധോണി കളിച്ചേക്കുമെന്നും ഇതോടെ റിപ്പോര്‍ട്ടുകള്‍ പുറത്ത് വരുന്നുണ്ട്.
അമ്പരന്ന് അധികൃതര്‍
യാതൊരു മുന്നറിയിപ്പുമില്ലാതെ പെട്ടെന്ന് പരിശീലനത്തിനായി ധോണി എത്തിയതോടെ ഝാര്‍ഖണ്ഡ് ടീം മാനേജ്‌മെന്‍റും ടീമംഗങ്ങളും അക്ഷരാര്‍ത്ഥത്തില്‍ അമ്പരന്ന് പോയി. ധോണി എത്തുമെന്ന കാര്യം ആരെയും അറിയിച്ചിരുന്നില്ലെന്ന് ഝാര്‍ഖണ്ഡ് ടീം അധികൃതര്‍ വ്യക്തമാക്കി. ബൗളിങ് മെഷീന് മുന്നിലും നെറ്റ്‌സിലും കുറച്ചുനേരം ബാറ്റ് ചെയ്ത ശേഷമാണ് ധോണി മടങ്ങിയത്.
എന്തുകൊണ്ട് ധോണിയെ പുറത്താക്കി?
കഴിഞ്ഞ സെപ്റ്റംബറില്‍ ഏകദിന ലോകകപ്പ് കഴിഞ്ഞതിന് ശേഷം ധോണിക്ക് ഇന്ത്യന്‍ കുപ്പായത്തില്‍ കളിച്ചിട്ടില്ല. ഒരു നിശ്ചിത കാലയളവില്‍ മൂന്ന് ടി20 മത്സരങ്ങളെങ്കിലും കളിച്ചെങ്കില്‍ മാത്രമേ സെന്‍ട്രല്‍ കരാറില്‍ ഉള്‍പ്പെടുത്തുകയുള്ളൂ എന്നാല്‍ ബിസിസിഐ പ്രതിനിധി വ്യക്തമാക്കുന്നത്. കരാറില്‍ നിന്ന് ഒഴിവാക്കുന്നതായി ധോണിയെ നേരത്തെ അറിയിച്ചിരുന്നതായും അദ്ദേഹം പറഞ്ഞു. ട്വന്‍റി20 ലോകകപ്പ് ടീമില്‍ ധോണി തിരിച്ചെത്തിയാല്‍ ധോണിക്ക് പഴയത് പോലെ തന്നെ കരാര്‍ നല്‍കുമെന്നും അദ്ദേഹം അറിയിച്ചു.
ടി20 ലോകകപ്പ് ടീമില്‍ ധോണി തിരിച്ചുവരുമോ?
ട്വന്‍റി20 ലോകകപ്പ് നടക്കാന്‍ ഇനി മാസങ്ങള്‍ മാത്രമേ അവശേഷിക്കുന്നുള്ളൂ. ഈ സാഹചര്യത്തില്‍ ധോണി കരാര്‍ പട്ടികയില്‍ നിന്ന് പുറത്താകുന്നത് ആരാധകര്‍ക്ക് വലിയ ആശങ്കയാണ് സമ്മാനിച്ചിരിക്കുന്നത്. ധോണി ലോകകപ്പ് കളിക്കുമോ എന്ന കാര്യത്തിലും ഇതോടെ ആരാധകര്‍ക്ക് ആശങ്കയേറി. ഇന്ത്യയ്ക്കായി 2007ല്‍ ടി20 ലോകകപ്പും 2011ല്‍ ഏകദിന ലോകകപ്പും 2013ല്‍ ചാമ്പ്യന്‍സ് ട്രോഫിയും അടക്കമുള്ള കിരീടങ്ങള്‍ നേടിക്കൊടുത്ത സൂപ്പര്‍ ക്യാപ്റ്റനാണ് ധോണി.