ധോണി ജാ‍ർഖണ്ഡിന് വേണ്ടി കളിക്കാൻ ഇറങ്ങും

ന്യൂഡൽഹി: മുൻ ഇന്ത്യൻ ക്യാപ്റ്റൻ മഹേന്ദ്ര സിങ് ധോണി വീണ്ടും പ്രാദേശിക ക്രിക്കറ്റിൽ കളിക്കാൻ ഒരുങ്ങുന്നു. വിജയ് ഹസാരെ ട്രോഫിയിൽ ജാ‍ർഖണ്ഡിന് വേണ്ടിയാണ് ധോണി കളിക്കുക. ടൂർണമെൻറിൽ ജാ‍ർഖണ്ഡ് ക്വാർട്ടറിൽ കടന്ന് കഴിഞ്ഞു.

ഗ്രൂപ്പ് ഘട്ടത്തിൽ ധോണി ടീമിനായി കളിച്ചിരുന്നില്ല. എന്നാൽ ക്വാർട്ടറിൽ കളിക്കുമെന്നാണ് സൂചന. ഏഷ്യാകപ്പിലടക്കം ധോണിയുടെ ബാറ്റിങ് ഫോം പ്രതീക്ഷക്കൊത്ത ഉയർന്നിരുന്നില്ല. ലോകകപ്പിന് മുമ്പ് ബാറ്റിങിൽ ആത്മവിശ്വാസം വീണ്ടെടുക്കുകയായിരിക്കും ധോണിയുടെ ലക്ഷ്യം.

ഈ വർഷം ധോണി 15 ഏകദിനങ്ങളിലും ഏഴ് ടി20 മത്സരങ്ങളിലുമാണ് ഇന്ത്യക്കായി കളിച്ചത്. പ്രാദേശിക ക്രിക്കറ്റിൽ ധോണിയുടെ സാന്നിധ്യം ടീമിന് ഗുണം ചെയ്യുമെന്നാണ് കരുതുന്നത്.