ഒരോവറിൽ 43 റൺസ്; ക്രിക്കറ്റിൽ ഇതാ പുതിയ റെക്കോർഡ്!

ഹാമിൽട്ടൺ: ലോക ക്രിക്കറ്റിൽ പുതിയ റെക്കോർഡുമായി ന്യൂസിലൻറ് ബാറ്റ്സ്മാൻമാർ. ഒരോവറിൽ ആറ് സിക്സർ അടക്കം 43 റൺസ് അടിച്ചെടുത്താണ് ന്യൂസിലൻറ് ബാറ്റ്സ്മാൻമാരായ ജോ കാർട്ടറും ബ്രെറ്റ് ഹാംപ്റ്റണും റെക്കോർഡ് ബുക്കിൽ സ്ഥാനം പിടിച്ചത്.

ന്യൂസിലൻറ് പ്രാദേശിക ക്രിക്കറ്റിൽ നോർത്തേൺ ഡിസ്ട്രിക‍്‍ട‍്സും സെൻട്രൽ ഡിസ്ട്രിക‍്‍ട‍്സും തമ്മിലുള്ള മത്സരത്തിലാണ് റെക്കോർഡ് പിറന്നത്. സെൻട്രൽ ഡിസ്ട്രിക‍്‍ട‍്സിൻെറ ദക്ഷിണാഫ്രിക്കൻ വംശജനായ പേസർ വില്ലെം ലുഡിക്കിൻെറ ഓവറിലാണ് ബാറ്റ്സ്മാൻമാരുടെ വെടിക്കെട്ട് പ്രകടനം.

ആറ് സിക്സറും ഒരു ഫോറുമാണ് ഇരുവരും ചേർന്ന് അടിച്ചെടുത്തത്. രണ്ട് നോബോളുകളും കൂടെ ആയപ്പോഴാണ് ഒരോവറിൽ 43 റൺസ് ആയത്. മൂന്നാം പന്തിൽ ഒരു സിംഗിളും എടുത്തു. ലിസ്റ്റ് എ ക്രിക്കറ്റിലെ ലോക റെക്കോർഡ് ആയിട്ടാണ് ഇത് കണക്കിലാക്കുക. നേരത്തെ 39 റൺസായിരുന്നു റെക്കോർഡ്.