​ആദ്യ ട്വൻറി20യിൽ പാകിസ്ഥാനെതിരെ ന്യൂസിലൻറിന് വിജയം

വെല്ലിങ്‍ടൺ: പാകിസ്ഥാനെതിരായ ഏകദിന പരമ്പര തൂത്തുവാരിയ ന്യൂസിലൻറ് ട്വൻറി20യിലും വിജയക്കുതിപ്പ് തുടരുന്നു. തിങ്കളാഴ്ച നടന്ന ആദ്യ ട്വൻറി20യിൽ ഏഴ് വിക്കറ്റാണ് അവർ പാകിസ്ഥാനെ തകർത്തത്. മത്സരത്തിൽ ആദ്യം ബാറ്റ് ചെയ്ത പാക് നിര 19.4 ഓവറിൽ 105 റൺസിന് എല്ലാവരും പുറത്തായി.

സേത്ത് റാൻസ്, ടിം സൗത്തി എന്നിവ‍ർ മൂന്ന് വിക്കറ്റുകൾ വീതം വീഴ്ത്തി. 15.5 ഓവറിൽ 3 വിക്കറ്റ് നഷ്ടത്തിൽ ന്യൂസിലൻറ് ലക്ഷ്യം മറികടന്നു. കോളിൻ മുൺറോ 43 പന്തിൽ 49 റൺസെടുത്ത് പുറത്താവാതെ നിന്നു. മുൺറോ തന്നെയാണ് കളിയിലെ കേമൻ.

മത്സരവിജയത്തോടെ ട്വൻറി20 പരമ്പരയിൽ ന്യൂസിലൻറ് 1-0ന് മുന്നിലെത്തി. ഏകദിന പരമ്പര 5-0നാണ് അവ‍ർ സ്വന്തമാക്കിയത്.