ഹാർദിക് പാണ്ഡ്യയുടെ തിരിച്ചുവരവ്
ഓൾ റൗണ്ടർ ഹാർദിക് പാണ്ഡ്യയെ ന്യൂസിലൻറ് പര്യടനത്തിനുള്ള ടീമിൽ ഉൾപ്പെടുത്താൻ തന്നെയാണ് സെലക്ടർമാർ ഉദ്യേശിക്കുന്നത്. നേരത്തെ ഇന്ത്യ എ ടീമിൽ താരത്തെ ഉൾപ്പെടുത്തിയിരുന്നുവെങ്കിലും ശാരീരീക ക്ഷമതാ പരിശോധനയിൽ പരാജയപ്പെട്ടതിനെ തുടർന്ന് ഒഴിവാക്കുകയായിരുന്നു. എന്നാൽ ന്യൂസിലൻറ് പര്യടനത്തിനുള്ള ഏകദിന ടീമിൽ താരത്തെ പരിഗണിക്കുമോയെന്ന കാര്യം ഉറപ്പായിട്ടില്ല. പാണ്ഡ്യ ഇല്ലെങ്കിൽ ശിവം ദുബെയെ തന്നെ ടീമിൽ ഉൾപ്പെടുത്തും.
അജിങ്ക്യ രഹാനെ പരിഗണനയിൽ
സീനിയർ താരം അജിങ്ക്യ രഹാനെ ഇന്ത്യയുടെ ഏകദിന ടീമിലേക്ക് തിരിച്ചെത്തിയേക്കും. 2018 ഫെബ്രുവരിക്ക് ശേഷം രഹാനെ ഇന്ത്യക്കായി ഒരു ഏകദിനം പോലും കളിച്ചിട്ടില്ല. 2019 ലോകകപ്പ് ടീമിലും രഹാനെയെ ഉൾപ്പെടുത്തിയിരുന്നില്ല. മധ്യനിര ബാറ്റ്സ്മാനായി രഹാനെ ടീമിലെത്തിയേക്കും. അവസാനം കളിച്ച ടെസ്റ്റ് പരമ്പരകളിൽ രഹാനെ മികച്ച ഫോമിലായിരുന്നു.
അരങ്ങേറ്റത്തിന് വിളികാത്ത് സൂര്യകുമാർ യാദവ്
മുംബൈ താരം സൂര്യകുമാർ യാദവാണ് ടീമിലേക്ക് വിളി കാത്തിരിക്കുന്ന മറ്റൊരു താരം. പ്രാദേശിക ക്രിക്കറ്റിൽ മിന്നുന്ന ഫോമിലാണ് യാദവ്. രഹാനെയും യാദവുമാണ് മധ്യനിര ബാറ്റ്സ്മാൻ എന്ന നിലയിൽ മത്സരത്തിലുള്ളത്.
കേദാർ ജാധവ് പുറത്തേക്ക് ?
ഇന്ത്യയുടെ ഏകദിന ടീമിൽ കേദാർ ജാധവിൻെറ നാളുകൾ എണ്ണപ്പെട്ട് കഴിഞ്ഞു. ലോകകപ്പിന് ശേഷം തന്നെ താരത്തെ ഇനി അധികം പരിഗണിക്കില്ലെന്ന് സൂചനകളുണ്ടായിരുന്നു. ഓസ്ട്രേലിയക്കെതിരായ പരമ്പരയിൽ ജാധവുണ്ട്. എന്നാൽ ന്യൂസിലൻറ് പര്യടനത്തിൽ അദ്ദേഹത്തെ പരിഗണിച്ചേക്കില്ലെന്നാണ് റിപ്പോർട്ടുകൾ. ബോളിങ് ഓപ്ഷനായും ജാധവിനെ ഇപ്പോൾ ഇന്ത്യൻ ടീമിൽ കണക്കിലെടുക്കുന്നില്ല. സൂര്യകുമാർ യാദവ്, രഹാനെ എന്നിവരാണ് പകരം പരിഗണിക്കപ്പെടാൻ സാധ്യത.