സഞ്ജുവിന് വീണ്ടും വമ്പൻ തിരിച്ചടി, ഈ ടീമിലേക്കും ഇനി പരിഗണിക്കില്ല; ആരാധക‍ർ നിരാശയിൽ

ഏഷ്യാ കപ്പിന് ശേഷം ഇന്ത്യ ഓസ്ട്രേലിയക്കെതിരെയാണ് കളിക്കാൻ പോവുന്നത്. ലോകകപ്പിന് മുമ്പ് ഇന്ത്യയുടെ അവസാന ഏകദിന പരമ്പരയാണ് ഓസീസിനെതിരെ നടക്കുക. ഞായറാഴ്ചയാണ് (സെപ്തംബർ 17) ഏഷ്യാ കപ്പ് ഫൈനൽ.

സെപ്തംബർ 22നാണ് ഓസ്ട്രേലിയക്കെതിരായ പരമ്പര ആരംഭിക്കുന്നത്. 22,24,27 തീയ്യതികളിലാണ് ഇന്ത്യ - ഓസ്ട്രേലിയ പോരാട്ടം. പരമ്പരയ്ക്ക് ശേഷം ലോകകപ്പിൽ ആതിഥേയരായ ഇന്ത്യ ആദ്യം നേരിടാൻ പോവുന്നതും ഓസ്ട്രേലിയയെ തന്നെയാണ്.

ഏഷ്യാ കപ്പിനുള്ള ടീമിൽ റിസ‍ർവ് താരമായിരുന്ന സഞ്ജു സാംസൺ ഓസ്ട്രേലിയക്കെതിരെയും പരിഗണിക്കപ്പെടില്ലെന്ന് ഉറപ്പാണ്. ശ്രേയസ് അയ്യരും കെഎൽ രാഹുലും പരിക്ക് മാറിയെത്തിയതോടെ സഞ്ജുവിന് മുന്നിലുള്ള സാധ്യത മങ്ങി.

ഏകദിന ലോകകപ്പിന് ശേഷം മാത്രമേ ഇനി സഞ്ജു സാംസണിനെ ഇന്ത്യൻ ജഴ്സിയിൽ കാണാൻ സാധിക്കുകയുള്ളൂ. ലോകകപ്പിന് ഇന്ത്യയുടെ റിസർവ് താരങ്ങളെ ഇത് വരെ പ്രഖ്യാപിച്ചിട്ടില്ല. അക്കൂട്ടത്തിൽ സഞ്ജു സ്ഥാനം പിടിക്കാനുള്ള സാധ്യതയുണ്ട്. ഏതെങ്കിലും ബാറ്റർക്ക് പരിക്കേൽക്കുകയാണെങ്കിൽ സഞ്ജുവിനെയായിരിക്കും ആദ്യം പരിഗണിക്കുക.

ഇന്ത്യയുടെ അടുത്ത ടി20 ലോകകപ്പ് ടീമിലേക്ക് സഞ്ജു നേരത്തെ തന്നെ പരിഗണിക്കപ്പെടാനുള്ള സാധ്യതയുമുണ്ട്. വിരാട് കോഹ്ലി, രോഹിത് ശ‍ർമ എന്നിവർ നിലവിൽ ടി20 ഫോർമാറ്റിൽ നിന്ന് മാറിനിൽക്കുകയാണ്. ഹാ‍ർദിക് പാണ്ഡ്യ നയിക്കുന്ന ടീമിൽ സഞ്ജു സാംസണിന് സാധ്യതയുണ്ട്.

ലോകകപ്പിന് പ്രഖ്യാപിച്ചിരുന്ന അതേ ടീമിനെ തന്നെ ഇന്ത്യ ഓസ്ട്രേലിയക്കെതിരെയും നില നിർത്താൻ തന്നെയാണ് സാധ്യത. വലിയ മാറ്റങ്ങളൊന്നും തന്നെ നടത്താനുള്ള സാധ്യത കുറവാണ്.

ടീം ഇവരിൽ നിന്ന്:

രോഹിത് ശർമ (ക്യാപ്റ്റൻ), ഹാർദിക് പാണ്ഡ്യ (വൈസ് ക്യാപ്റ്റൻ), ശുഭ്മാൻ ഗിൽ, വിരാട് കോഹ്‌ലി, ശ്രേയസ് അയ്യർ, ഇഷാൻ കിഷൻ, കെഎൽ രാഹുൽ, സൂര്യകുമാർ യാദവ്, രവീന്ദ്ര ജഡേജ, അക്സർ പട്ടേൽ, ഷാർദുൽ താക്കൂർ, ജസ്പ്രീത് ബുംറ, മുഹമ്മദ് ഷമി, മുഹമ്മദ് സിറാജ്, കുൽദീപ് യാദവ്.