പാകിസ്ഥാന് പറ്റിയ അമളി മുതലാക്കി ഓസ്ട്രേലിയന്‍ റണ്‍ ഔട്ട്

അബുദാബി ക്രിക്കറ്റ് ടെസ്റ്റില്‍ നിന്ന് ഒരു രസകരമായ റണ്‍ ഔട്ട്. പാകിസ്ഥാന്‍ ബാറ്റ്‍സ്‍മാന്‍ അസര്‍ അലിയാണ് റണ്‍ ഔട്ടിന് ഇരയായത്. പന്ത് ബൗണ്ടറി കടന്നുവെന്ന് കരുതി ഓട്ടം അവസാനിപ്പിച്ച് സഹ ബാറ്റ്‍സ്‍മാനോട് സംസാരിച്ചിരുന്ന അസറിനെ ഓസ്ട്രേലിയന്‍ വിക്കറ്റ് കീപ്പര്‍ റണ്‍ ഔട്ട് ആക്കുകയായിരുന്നു.

സംഭവം ഇങ്ങനെ; പീറ്റര്‍ സിഡില്‍ എറിഞ്ഞ 52-ാമത്തെ ഓവറില്‍ അസര്‍ അലി എഡ്‍ജ്‍ ചെയ്‍ത പന്ത് സ്ലിപ്പിലൂടെ ഉരുണ്ടുപോയി. പന്തിന്‍റെ കുതിപ്പ് കണ്ട് ബൗണ്ടറിയാണെന്ന് ഉറപ്പിച്ച അസര്‍ അലി, സ്വാഭാവികമായ കുശലാന്വേഷണത്തിന് സഹ ബാറ്റ്‍സ്‍മാന്‍റെ അടുത്തെത്തി.


പക്ഷേ, ബൗണ്ടറിക്ക് തൊട്ടുമുന്‍പ് പന്തിന്‍റെ കുതിപ്പ് അവസാനിച്ചിരുന്നു. ഇത് പാകിസ്ഥാന്‍ ടീമംഗങ്ങള്‍ അറിഞ്ഞില്ല. പന്ത് പിന്തുടര്‍ന്ന് പിടിച്ച മിച്ചല്‍ സ്റ്റാര്‍ക്ക് കീപ്പര്‍ക്ക് പന്ത് എറിഞ്ഞുനല്‍കി. കുതന്ത്രത്തില്‍ ഒട്ടുംമോശമല്ലാത്ത ഓസ്ട്രേലിയന്‍ ക്രിക്കറ്റ് ടീമംഗങ്ങള്‍ ഒന്നും സംഭവിക്കാത്തത് പോലെ അഭിനയിക്കുകയും അസറിനെ റണ്‍ ഔട്ട് ആക്കിയശേഷം ആഘോഷിക്കുകയും ചെയ്‍തു.

എന്താണ് സംഭവിച്ചതെന്ന് അറിയാതെ ക്രീസില്‍ കുറച്ചുനേരം നിന്ന ശേഷം അസര്‍ അലി തിരികെ പവലിയനിലേക്ക് മടങ്ങി.