രണ്ട് സൂപ്പർതാരങ്ങളെ തിരികെ വിളിച്ചു; ഇന്ത്യക്കെതിരെ ആദ്യ രണ്ട് ടി20ക്ക് വിൻഡീസ് റെഡി

ഗയാന: ആഗസ്ത് മൂന്നിനും നാലിനുമായി ഇന്ത്യക്കെതിരെ യുഎസിലെ ഫ്ലോറിഡയിൽ നടക്കാൻ പോവുന്ന ആദ്യ രണ്ട് ട്വൻറി20 മത്സരങ്ങൾക്കുള്ള വെസ്റ്റ് ഇൻഡീസ് ക്രിക്കറ്റ് ടീമിനെ പ്രഖ്യാപിച്ചു. കാർലോസ് ബ്രാത‍്‍വെയിറ്റ് നയിക്കുന്ന പതിനാലംഗ ടീമിനെയാണ് പ്രഖ്യാപിച്ചിട്ടുള്ളത്. മൂന്ന് ടി20 മത്സരങ്ങളാണ് ഇന്ത്യയും വെസ്റ്റ് ഇൻഡീസും തമ്മിൽ കളിക്കുന്നത്. മൂന്നാമത്തെ മത്സരത്തിനുള്ള ടീമിനെ പിന്നീട് പ്രഖ്യാപിക്കും.

വെടിക്കെട്ട് ഓപ്പണർ ക്രിസ് ഗെയിൽ ടീമിൽ ഇല്ല. കാനഡയിൽ ജിടി20യിൽ കളിക്കുന്നതിൻെറ ഭാഗമായി ടീമിൽ നിന്ന് ഒഴിവാക്കണമെന്ന് ഗെയിൽ അഭ്യർഥിച്ചിരുന്നു. ഇതിനാലാണ് അദ്ദേഹത്തെ ഒഴിവാക്കിയതെന്ന് വിൻഡീസ് ക്രിക്കറ്റിൻെറ സെലക്ഷൻ പാനൽ താൽക്കാലിക ചെയർമാൻ റോബർട്ട് ഹെയ്നസ് പറഞ്ഞു. ഗെയിലിന് പകരക്കാരനായി ജോൺ കാംപെൽ ടീമിൽ ഇടം പിടിച്ചു.

കാൽമുട്ടിന് പരിക്ക് കാരണം ലോകകപ്പിലെ അവസാന മത്സരങ്ങൾ കളിക്കാതിരുന്ന ആന്ദ്രേ റസ്സലും ടീമിലുണ്ട്. കൂടാതെ സീനിയർ താരങ്ങളായ സുനിൽ നരെയ്നെയും കീറോൺ പൊള്ളാർഡിനെയും ആദ്യ രണ്ട് ട്വൻറി20ക്കായുള്ള ടീമിൽ ഉൾപ്പെടുത്തിയിട്ടുണ്ട്. ഐപിഎല്ലിലും മറ്റും കളിച്ച് മികച്ച പ്രകടനം കാഴ്ച വെച്ചിട്ടുള്ളവരാണ് ഇരുതാരങ്ങളും. ഏകദേശം രണ്ട് വർഷം മുമ്പാണ് നരെയ്ൻ വെസ്റ്റ് ഇൻഡീസിന് വേണ്ടി ടി20യിൽ കളിച്ചിട്ടുള്ളത്. കഴിഞ്ഞ വർഷം നവംബറിൽ ഇന്ത്യക്കെതിരെയാണ് പൊള്ളാർഡ് അവസാനമായി ടീമിൽ കളിച്ചിട്ടുള്ളത്.

വിൻഡീസ് പര്യടനത്തിനില്ല; ഇന്ത്യൻ ടീമിൽ ഒരു താരത്തിൻെറ കരിയർ അവസാനിക്കുന്നു?

ടീം ഇവരിൽ നിന്ന്: കാർലോസ് ബ്രാത‍്‍വെയിറ്റ്, സുനിൽ നരെയ‍്‍ൻ, കീമോ പോൾ, കാരി പിയറെ, കീറോൺ പൊള്ളാർഡ്, നിക്കോളാസ് പൂരൻ, റോവ്മാൻ പവൽ, ആന്ദ്രേ റസ്സൽ, ഒഷാനെ തോമസ്, ആൻറണി ബ്രാമ്പിൾ, ജോൺ കാംപെൽ, ഷെൽഡൻ കോട്രൽ, ഷിംറോൺ ഹെറ്റ‍്‍മെയർ, എവിൻ ലെവിസ്.