അശ്വിൻ കളിച്ചേക്കില്ല
നാലാം ടെസ്റ്റിൽ അശ്വിൻ കളിക്കാനുള്ള സാധ്യത കുറവാണെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്യുന്നു. 40 ശതമാനം മാത്രമാണ് നിലവിൽ കളിക്കാനുള്ള സാധ്യത. സിഡ്നി ടെസ്റ്റിൽ തന്നെ പുറംവേദന താരത്തെ വലച്ചിരുന്നു. ഷൂ ലേസ് കെട്ടാൻ പോലും അദ്ദേഹത്തിന് സാധിച്ചില്ലെന്ന് അശ്വിൻെറ ഭാര്യ പ്രീതി വെളിപ്പെടുത്തിയിരുന്നു. എന്നാൽ എല്ലാം അതിജീവിച്ച് ഇറങ്ങിയ അശ്വിൻ ബാറ്റ് കൊണ്ട് ഇന്ത്യയെ സമനിലയിൽ വരെയെത്തിച്ചു.
സുന്ദറിന് അരങ്ങേറ്റം
രവീന്ദ്ര ജഡേജ ഇല്ലാത്ത സാഹചര്യത്തിൽ വാഷിങ്ടൺ സുന്ദറായിരിക്കും ഇന്ത്യക്ക് വേണ്ടി കളിക്കാനിറങ്ങുക. ജഡേജയെ കൃത്യമായി റീപ്ലേസ് ചെയ്യാൻ പറ്റുന്ന കളിക്കാരനാണ് സുന്ദർ. ബാറ്റിങും നന്നായി വഴങ്ങുമെന്നതിനാൽ ഗബ്ബയിൽ ഇന്ത്യ സുന്ദറിനെ കളിത്തിലിറക്കിയേക്കും. സീനിയർ സ്പിന്നറായ കുൽദീപ് യാദവിനെ പരിഗണിക്കാൻ സാധ്യതയില്ല.
നാല് പേസർമാരെ കളിപ്പിച്ചേക്കും
അശ്വിന് കളിക്കാൻ സാധിച്ചില്ലെങ്കിൽ ഇന്ത്യ നാല് പേസർമാരെയായിരിക്കും കളിപ്പിക്കുക. മുഹമ്മദ് സിറാജ്, നവദീപ് സെയ്നി എന്നിവർ ഈ പരമ്പരയിൽ അരങ്ങേറ്റം നടത്തിയവരാണ്. അവർക്കൊപ്പം ടി നടരാജൻ അരങ്ങേറ്റ മത്സരത്തിനായി ഇറങ്ങും. ശാർദൂൽ താക്കൂറായിരിക്കും മറ്റൊരു പേസർ. ഓസ്ട്രേലിയ ഒരേയൊരു സ്പിന്നറെയാണ് കളിപ്പിക്കുന്നത്. ഗബ്ബയിൽ ഇതേ തന്ത്രമായിരിക്കും ഇന്ത്യ തിരിച്ച് പുറത്തെടുക്കുക.
(Getty Images)