രവി ശാസ്ത്രി ഇന്ത്യന്‍ ക്രിക്കറ്റ് ടീം പരിശീലകന്‍

ന്യൂഡല്‍ഹി:പരിശീലകനെ തിരക്കിട്ട് തെരഞ്ഞെടുക്കാനില്ലെന്ന് സൗരവ് ഗാംഗുലി പറഞ്ഞ് ഒരുദിവസത്തിനുള്ളില്‍ ഇന്ത്യന്‍ ക്രിക്കറ്റ് ടീമിന്‍റെ പുതിയ പരിശീലകനായി രവി ശാസ്ത്രിയെ നിയമിച്ചു.

രവിശാസ്ത്രിക്കൊപ്പം രാഹുല്‍ ദ്രാവിഡിനെയും സഹീര്‍ ഖാനെയും സഹ കോച്ചുമാരായി നിയമിച്ചിട്ടുണ്ട്.

ഐസിസിയുടെ 2019 ലോകകപ്പ് വരെ രണ്ട് വര്‍ഷത്തേക്കാണ് നിയമനം. ഇന്ത്യന്‍ ടീമിന്‍റെ ഡയറക്ടറായി 2014 മുതല്‍ 2016വരെ രവി ശാസ്ത്രി പ്രവര്‍ത്തിച്ചിട്ടുണ്ട്.

കോച്ചുമാരെ തെരഞ്ഞെടുക്കാനുള്ള ആദ്യ അപേക്ഷ ക്ഷണിച്ചപ്പോള്‍ രവി ശാസ്ത്രി താല്‍പര്യം പ്രകടിപ്പിച്ചിരുന്നില്ല. തീയതി നീട്ടിയതിന് ശേഷമായിരുന്നു ശാസ്ത്രി അപേക്ഷ നല്‍കിയത്. മുന്‍ ഇന്ത്യന്‍ ക്രിക്കറ്റര്‍ വിരേന്ദര്‍ സെവാഗ്, ഓസ്ട്രേലിയന്‍താരം ടോം മൂഡി, ലാല്‍ചന്ദ് രജ്‍പുത്, വിൻഡീസ് താരം റിച്ചാര്‍ഡ് പൈബസ് എന്നിവരാണ് മറ്റുള്ള അപേക്ഷകര്‍.

ശാസ്ത്രിയോട് അടുപ്പമുള്ള വിരാട് കോഹ്‍ലിയുടെ നിര്‍ദേശംകൂടി പരിഗണിച്ചാണ് കോച്ച് നിയമനം. കോഹ്‍ലിയുമായുള്ള ഭിന്നതയെത്തുടര്‍ന്നാണ് മുന്‍കോച്ച് അനില്‍ കുംബ്ലെ രാജിവെച്ചത്.

സച്ചിന്‍ ടെണ്ടുല്‍ക്കര്‍, സൗരവ് ഗാംഗുലി, വിവിഎസ് ലക്ഷ്‍മണ്‍ എന്നിവര്‍ ചേര്‍ന്ന സമിതിയാണ് കോച്ചിനെ തെരഞ്ഞെടുത്തത്. ഡയറക്ടര്‍ സ്ഥാനത്ത് നിന്ന് ശാസ്ത്രിയെ മാറ്റിയത് ഗാംഗുലിയുടെ അപ്രീതിയെത്തുടര്‍ന്നായിരുന്നു. പകരംവന്ന കുംബ്ലെയെ കോഹ്‍ലി ഉള്‍ക്കൊണ്ടുമില്ല.

ഇന്ത്യയുടെ എക്കാലത്തെയും മികച്ച ഓള്‍റൗണ്ടര്‍മാരില്‍ ഒരാളായ ശാസ്ത്രി, ക്രിക്കറ്റ് കമന്‍റേറ്ററുമാണ്. ശാസ്ത്രിയുടെ കീഴില്‍ ഇന്ത്യ ഐസിസി ഇവന്‍റുകളില്‍ സെമി-ഫൈനലുകളിലും ഐസിസി ടെസ്റ്റ് റാങ്കിങ്ങില്‍ ഒന്നാം സ്ഥാനത്തും എത്തി.

Ravi Shastri Appointed as Team India Coach

Team India Coach : Ravi Shastri Appointed as Team India Coach